Бурхангүй газрын бумбанууд буюу У.Хүрэлсүх, Л.Оюун-Эрдэнэ хоёрын “үе мултарсан” нөхөрлөл МАН-ыг хаана хүргэх вэ

Б. Цогтбаяр:
Улс төр- Тоймчийн үг

2021-01-27, 1607

Бид Л.Оюун-Эрдэнэ гэдэг шинэ Ерөнхий сайдтай болох гэж байна. Тэр таван сарын дараа 41 нас хүрнэ. 80-аад оныхон “Үе чацуу Ерөнхий сайдтай болчихлоо” гээд бөөн баяр байх шиг. Нээрээ ч үеийнхэн дундаа хамгийн “том” нь тэр болж байгаа юм л даа. Гэхдээ МАН-ынхан дундаа бол “Z” үеийнх буюу хамгийн сүүлийн үеийн “бүтээгдэхүүн” нь. Шинэ Ерөнхий сайд Л.Оюун-Эрдэнэ маань “агаа” нараасаа буюу Миеэ.Энхболдоос 16, Сү.Батболдоос 17, С.Баяраас 24, М.Энхсайханаас 25 дүү юм. Өөрөөр бол түүнийг төрж байхад Сү.Батболд Нийслэлийн 14 дүгээр сургуулийг төгсөж байлаа. Харин С.Баяр Зэвсэгт хүчний жанжин штабт офицер, М.Энхсайхан Гадаад худалдааны яаманд эдийн засагч байсан.

Монголд Ардчилал ялж, хонхны дуу эгшиглэж байхад тэр хоёрдугаар ангийн сурагч, хөөрхөн бор хүү болсон байлаа. Цаг хугацаа явсаар, түүнийг арван жилээ төгсөж байх үед нь М.Энхсайхан Ерөнхий сайд, С.Баяр Ерөнхийлөгчийн Тамгын газрын дарга, Миеэ.Энхболд Чингэлтэй дүүргийн ИТХ-ын Тэргүүлэгчдийн дарга, Сү.Батболд “Алтай трейдинг” ХХЗ-ийн захирал болсон байв.

Харин одоо Л.Оюун-Эрдэнэ Ерөнхий сайд болж, М.Энхсайхан, С.Баяр хоёр шоронгийн хоригдол, Миеэ.Энхболд “ажилгүй”, ач зээгээ хараад гэртээ суудаг болжээ. МАН-ын “акул”-уудаас Сү.Батболд л галаа сахиж үлдсэн ч одоогийн ил харагдах, бичигдэх талаасаа Л.Оюун-Эрдэнээс албан тушаал доогуур гэгдэнэ. Цаг хугацааны тохуурхал гэмээр. Уг нь, АНУ-ын шинэ Ерөнхийлөгч 77 настай Жой Байдентэй харьцуулахад С.Баяр 65-тай, М.Энхсайхан 66-тай буюу дэлхийн улс төрд цэл залуухнаараа байв. Одоо “Оюутолгой”-н хөрөнгө оруулалтын гэрээний асуудлаар дээсэн дөрөөн дээр дэнжигнэж байгаа Сү.Батболд “уначихвал” МАН-ын дээд үеийн төлүүллүүд “дуусна”. Чухамдаа МАН-ын “акул”-ууд нь албан ёсоор У.Хүрэлсүх, Л.Оюун-Эрдэнэ болно гэх үү дээ.

У.Хүрэлсүхийн хувьд Л.Оюун-Эрдэнээс 12 насаар ах, МАН-ын дунд үеийн төлөөлөл. Л.Оюун-Эрдэнийг ахлах сургуулиа төгсөж байх үед нь МАСЗХ буюу одоогийн Нийгмийн Ардчилал Монголын Залуучуудын Холбооны Ерөнхийлөгч байлаа. Хэдий тэд үе мултрах шахуу насны зөрүүтэй, дунд, сүүл үеийн төлөөллүүд боловч одоо хамтдаа МАН-ын “томчууд” болцгоож байна.

Бид МАН-ын дээд, дунд, сүүл үеийнхнийг ийн харьцуулснаараа нэг зүйлийг харуулахыг зорьсон юм. Тэр нь У.Хүрэлсүх, Л.Оюун-Эрдэнэ хоёр МАН-ын толгойд эзэн сууж, өөрсдийн ноёрхлыг тогтоохын тулд өөрсдийг нь улс төрд хөтөлж оруулсан, гарыг нь ганзаганд хүргэсэн ах нараа элдэв “дэггүйтэл”-ээр нь “намнаж”, томчуудаа “тонгорч” явсаар өнөөдрийн түвшинд гарч ирж байгааг цөөнгүй хүн анзаараад буй. Тодруулбал, С.Баяр, М.Энхсайхан, М.Энхболд нарын МАН-ын хууччуул улс төрийн А,Б-гүй, учраа ч мэдэхгүй явсан хөвгүүдийг дараагийн үеэрээ бэлтгэж, улс төрд суралцуулж, албан тушаалын амтыг мэдрүүлж байхуйдаа өөрсөд рүү нь ийнхүү эргэж ноцох “чоно” тэжээж буйгаа мэдээгүй биз. Тиймдээ ч өөрсдийн тэжээсэн “чононууд”-даа бариулаад дуусч байх шиг.

У.Хүрэлсүх, Л.Оюун-Эрдэнэ нарын МАН-ын толгойд гарч ирсэн замыг тун энгийнээр хэлбэл, тэд ах нарыгаа албан тушаалын оргилд явцгаах үед нь дэргэд нь сөхөрч суугаад архи хундагалж байхуйдаа хамаг нууцыг нь сонсож суусан гэдэг. Олон жил, олон ч нууцыг нь сонсож явсных нь хариуд ах нар нь тэднийг албан тушаал, эрх мэдлийн зах зухтай болгож. Гэтэл албан тушаалтай болсон ах дүү хоёр үгсэн хуйвалдаад, архи хундагалж байхуйдаа сонссон нууцуудаа дэлгэж, заримаар нь шантаажилж, замаасаа зайлуулж, улс төр дэх орон зайг нь булаасан л гэсэн үг. Өөх өгсөн хүнтэй өглөө босоод яана гэдэг билээ дээ. Энэ мэтээр улс төрийн өрөг дээрээс ах нарыгаа “нясалж” дуусаж буй “ах, дүү” хоёр Монголын төрд ээлжлэн бэрс гарцгааж, одоо нэг нь ноён болохоор зориг шулууджээ. Чухамдаа дүү нь Ерөнхий сайд, ах нь Ерөнхийлөгч болохоор зорьж буй. Зэвсэг нэгт ахан дүүсийн эрх мэдлийн төлөөх дайны сүүлчийн “золиос” нь магад Сү.Батболд. Түүнд хэчнээн мөнгө байгаад бэрс, ноён хоёрын дүрэмгүй нүүдлийн дээр гарах нь юу л бол.

Бурхангүй газрын бумбанууд буюу У.Хүрэлсүх, Л.Оюун-Эрдэнэ хоёрын “үе мултарсан” нөхөрлөл МАН-ыг хаана хүргэх вэ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 4

Сэтгэгдэл үлдээсэн: 2021-02-07 00:03:45

чимэд: Хүрэлсүх зөв явсан ерөнхийлөгч болох ёстой яахлаараа дандаа хохирч байх ёстой ард түмэн билээ бид Атаархсан хорссон хорлох сонирхолтой хэд гурван хүн байдаг гэдгийг мартаж үл болно Мөн ч их бичиж гүжир таамаг их дэвшүүлж байнаОюунэрдэнэ та хоёр тийм юм уншиж цагаа гарздаж хэрэггүй ,жингийн цуваа чиглэлээ өөрчилдөггүй жингэр гичийнүүд хуцсаар хоцордог гэсэн гайхалтай үгийг санаад л зүтгээд бай Одоо хөгшин залуугүй ,намын ялгаагүй сайн хүмүүс бүгд хүлээн зөвшөөрчээ. Хоёр дүүдээ амжилт хүсье
Сэтгэгдэл үлдээсэн: 2021-01-28 06:47:06

1: Дэлхий бөөрөнхий гэдгийг түрүүлж мэдээд цаазлуулж байсан шиг от Монголыг тэжээж байгаа үнэнийг хэлсэн хүнийг харанхуй хах массаараа яллуулдаг улсууд хэр хол явах бол
Сэтгэгдэл үлдээсэн: 2021-01-27 13:48:05

өыб: Хэнтийн бас нэг тэнэг төр удирдаж тоглох юм байна.
Сэтгэгдэл үлдээсэн: 2021-01-27 11:44:40

Н.ЛХАГВАДОРЖ: МУ-ЫН EРӨНХИЙ САЙДАД НЭР ДЭВШИГЧ, ЗАЛУУ ТҮШМЭЛ, НУТГИЙН ДҮҮДЭЭ АМЖИЛТ ХҮСЬE. ТАВАН ТОЛГОЙ, ОЮУ ТОЛГОЙ, РИО ТИНТО, ДУБАЙН ГЭРЭЭ ЗЭРГИЙГ МОНГОЛ ТӨРИЙН ЭРХ АШИГТ НИЙЦҮҮЛЭН ШИЙДЭХ ЭРС ТЭМЦЛЭЭ СУЛРУУЛАЛГҮЙ ЦУЦАЛТГҮЙ ҮРГЭЛЖЛҮҮЛЭХИЙГ ХҮСЬE.