ЭРГЭЛТ.мн сайт уламжлал ёсоороо өнгөрсөн долоо хоногт улс төр, эдийн засаг, нийгмийн салбарт өрнөсөн онцлох үйл явдлыг тоймлон хүргэж байна.

-ОЮУТОЛГОЙН АСУУДАЛД ЕРӨНХИЙ САЙД АСАН Ч.САЙХАНБИЛЭГ ТАЙЛБАР ХИЙВ-

Өнгөрсөн долоо хоногийн эхнээс л Оюутолгойн асуудал дахин сөхөгдөв. Ерөнхий сайд асан Ч.Сайханбилэг Засгийн газрын хэрэг эрхлэх газрын дэд дарга Б.Солонгоод хандаж АНУ-аас үг дайсан билээ. Тэрбээр “Үгээ хэлэх, тайлбар өгөх боломжгүй хүмүүсийг эрхэм дүү эх орноо 22 тэрбумын өрөнд унагаасан хүмүүс болгоод зарлачихлаа” хэмээн Оюутолгойн гэрээний талаар тайлбар бичсэн байв.

Мөн Ерөнхийлөгч Х.Баттулга Оюутолгой төслийн бүрэн мэдээллийг ирүүлэх хүсэлтийг Засгийн газарт хүргүүлсэн.  

-ХАЛДВАРТАЙ ЭХИЙГ ХАЛААД, УГЛААШТАЙ ЗӨӨВӨРЛӨСӨН ҮЙЛДЭЛ МОНГОЛЧУУДЫГ ЖАГСАХАД ХҮРГЭВ-

Энэ сарын 19-ний өглөө “Өргөө” амаржих газарт амаржсан эхээс коронавирусийн халдвар илэрсэн гэх мэдээлэл гарсан. Харин мягмар гарагийн орой нь тухайн иргэнийг ХӨСҮТ рүү тусгаарлахаар зөөвөрлөхдөө өвлийн хүйтэнд халаад, углааштай гаргасан нь олон нийтийн бухимдлыг төрүүлсэн билээ. Улмаар лхагва гарагийн өглөө Сүхбаатарын талбайд халаад, углааштай жагсаал эхэлж, оройны 20:00 цагийн үед 4000 гаруй хүн цугласан байв. Энэ удаагийн жагсаал монголчуудын хувьд үзэл бодлоороо эрхийнхээ төлөө нэгдсэн үйлдэл болсон юм. Иргэд Улсын онцгой комисс болон хариуцлага алдсан албан тушаалтнуудыг огцрохыг шаардаж дуу хоолойгоо хүргэсэн. Тухайн өдөр уг асуудлаар Засгийн газар хуралдаж, Шадар сайд, Улсын онцгой комиссын дарга Я.Содбаатар, Эрүүл мэндийн сайд Т.Мөнхсайхан нар огцрох хүсэлтээ өгсөн билээ. Ингэснээр тухайн өдрийн жагсаал намжсан байдаг.

-У.ХҮРЭЛСҮХИЙН ЗАСГИЙН ГАЗАР ОГЦОРЛОО-

Энэ сарын 21-ний өглөө У.Хүрэлсүхийн Засгийн газар албан бусаар хуралдаж “Дайны талбарт хоёр нөхрөө үлдээхгүй. Хамт бүрэлдэхүүнээрээ огцорно” гэх саналыг гаргажээ. Ингээд МАН-ын Удирдах зөвлөл хуралдаж Ерөнхий сайд У.Хүрэлсүхийн өөрийн хүсэлтээр огцрох саналыг дэмжсэн байна. Үүний дараа У.Хүрэлсүх олон нийтэд хандан мэдэгдэл хийж, эх үр болон тэдний ар гэр, нийт ард түмнээсээ уучлалт гуйж, хариуцлага хүлээн огцорч байгаагаа албан ёсоор мэдэгдэв. Ингэхдээ өмнөх өдрийн жагсаалыг Ерөнхийлөгч Х.Баттулга зохион байгуулсан гэх мэдээллийг өгөв. ”Түүнчлэн МАН-ын бүлэг шуурхайлан хуралдаж, дараа нь Төрийн байгуулалтын байнгын хорооны хурлаар уг саналыг оруулан олонхийн саналаар огцруулахыг дэмжив.

Үүний дараа УИХ-ын чуулган хуралдаж, Монгол Улсын 31 дэх Ерөнхий сайд У.Хүрэлсүхийг 95.2 хувийн саналаар огцруулсан юм.

-ЕРӨНХИЙЛӨГЧ Х.БАТТУЛГА У.ХҮРЭЛСҮХЭД ХАНДАЖ ҮГ ХЭЛЭВ-

Ерөнхий сайд У.Хүрэлсүхийн мэдэгдлийн дараа Ерөнхийлөгч Х.Баттулга Үндэсний Аюулгүй байдлын зөвлөлийн хурал зарласан ч Ерөнхий сайд У.Хүрэлсүх, УИХ-ын дарга Г.Занданшатар нар очоогүй юм. Тэднийг УИХ-ын чуулганы хуралдаанд оролцож байх үед Ерөнхийлөгч Х.Баттулга орж ирсэн. Ингээд чуулганы индрээс Ерөнхий сайд У.Хүрэлсүхэд хандан “Сүхбаатарын Батболдын удирдсан бүлэглэл төрийн эргэлт хийж байна” гээд “Ерөнхий сайдын огцрох саналыг дэмжихгүй” байгаагаа илэрхийлсэн юм.

-32 ДАХЬ ЕРӨНХИЙ САЙДААР Л.ОЮУН-ЭРДЭНИЙН НЭРИЙГ ДЭВШҮҮЛЭВ-

Засгийн газар огцрохоос өмнө дараагийн Ерөнхий сайдаар Л.Оюун-Эрдэнийн нэрийг дэвшүүлэх тохироо аль эрт хийгдсэн байв. Ингээд баасан гарагийн өглөө МАН-ын Удирдах зөвлөл болон Бага хурал хуралдаж, У.Хүрэлсүхийн Засгийн газарт ЗГХЭГ-ын даргаар ажиллаж байсан Л.Оюун-Эрдэнийн нэрийг дэвшүүлжээ. Мөн бүлгийн хурлаар хэлэлцээд МАН-ын бүлгийн дарга Д.Тогтохсүрэн Ерөнхий сайдад нэр дэвшигчийг Ерөнхийлөгчтэй зөвшилцөхөөр өргөн барьсан юм. Энэ асуудал ирэх долоо хоногт эцэслэн шийдэгдэх бололтой.

-УИХ-ЫН ГИШҮҮН АСАН Д.ЭРДЭНЭБАТ, Б.БОЛОР НАРЫГ СУЛЛАВ-

Өнгөрсөн долоо хоногт өрнөсөн онцлох үйл явдлын нэг нь УИХ-ын гишүүн асан Д.Эрдэнэбат, Сангийн сайд асан Б.Болор нарыг суллав. Давж заалдах шатны шүүх хуралдаанаар тэдний ялыг өөрчилж, торгох шийдвэр гаргажээ. Анхан шатны шүүхээс Д.Эрдэнэбатыг нийтийн албанд томилогдох эрхийг таван жилийн хугацаагаар хасаж, 4.6 жилийн хорих ял оноогоод байсан билээ. Харин Сангийн сайд асан Б.Болорт нийтийн албанд томилогдох эрхийг дөрвөн жилийн хугацаагаар хасаж,  3.6 жилийн  хугацаагаар хорих ял ногдуулаад байсан юм. Тэгвэл тэдэнд оноосон ялыг торгох ял болгож өөрчилснөөр тэд суллагдах боломжтой боллоо.

Хэргийн эргэн сануулбал, Аж үйлдвэрийн сайд асан Д.Эрдэнэбат, Сангийн сайд асан Б.Болор  нарын долоон хүнийг “Эрдэнэт үйлдвэр”-ийн 49 хувийг хууль бусаар шилжүүлж, эрх мэдэл, албан тушаалын байдлаа урвуулан ашиглаж, бусдад давуу байдал олгосон гэх үндэслэлээр яллах дүгнэлт үйлдэж, шүүхээс гэм буруутай хэмээн үзсэн юм.

-АНУ-ЫН ЕРӨНХИЙЛӨГЧИЙН ТАНГАРАГ ӨРГӨХ ЁСЛОЛ СҮР ДУУЛИАНТАЙ БОЛЖ ӨНГӨРЛӨӨ-

Харин Олон улсад өрнөсөн онцлох үйл явдал гэвэл АНУ-ын Ерөнхийлөгчийн тангараг өргөх ёслол байлаа. АНУ-ын 46 дахь Ерөнхийлөгч Жо Байден болон анхны эмэгтэй дэд ерөнхийлөгч Камара Харрис нарын тангараг өргөх ёслол сүр дуулиантай болж өнгөрлөө. Тангараг өргөх ёслолын үеэр Вашингтонд хэсэгчлэн хөл хорио тогтоож, Капитолыг Үндэсний гвардын 20 мянга гаруй цэрэг хамгаалан ажилласан юм. Америкийн түүхэнд байгаагүй сүр дуулиантай зохион байгуулсан шинэ төрийн тэргүүний тангараг өргөх ёслолын төгсгөлд тус улсын шинэ Ерөнхийлөгч Жо Байден үг хэлэв. Тэрбээр “Эмх замбараагүйгээр ямар ч үндэстэн оршин тогтнож чадахгүй. Бид холбоотнуудаа дахин нэгтгэн нийлүүлж, дэлхий нийтийг цуглуулах болно” гэв. Шинэ Ерөнхийлөгчид баяр хүргэхээр тус улсын Ерөнхийлөгч асан Билл Клинтон, Жорж Буш, Барак Обама нар хүрэлцэн ирсэн байв.