МАН-аас Ерөнхийлөгчийн сонгуульд нэр дэвших хамгийн өндөр рейтингтэй хүн нь У.Хүрэлсүх байв. Харин намын генсек нь Ерөнхийлөгчийн сонгуульд нэр дэвших боломжтой 10 хүнийг нэрлэж, УИХ-ын гишүүн Сү.Батболд нэлээд дээгүүрт орсноор түүнийг “Ерөнхийлөгчийн сонгуульд намаа төлөөлж өрсөлдөх нь” гэх таамгууд ар араасаа хөвөрлөө.
Удалгүй Сү.Батболд “Намынхан маань итгэл хүлээлгэвэл татгалзах зүйлгүй” гэх ярилцлага хэвлэлд өгснөөр Ерөнхийлөгчийн сонгуульд горилогч ээлжит улстөрчөөр нэрлэгдээд байна. Оффшор бүсэд их хэмжээний хөрөнгө эзэмшдэг түүнийг төрөөс төрсөн тэрбумтан гэж нэрлэх нь ч бий. 2000 оны эхэн үеэс улс төрд орсон тэрбээр төрийн өндөр дээд албан тушаалаас нэг ч удаа буулгүй өнөөдрийг хүргэсэн. Магадгүй Ерөнхийлөгчийн зөөлөн сэнтийд заларчихаад, тэтгэвэрт гарах бодолтой байхыг ч үгүйсгэхгүй юм.
Ерөнхий сайд У.Хүрэлсүх хамгийн ашигтай хувилбарыг сонгосон нь тодорхой. Үндсэн хуулийн нэмэлт, өөрчлөлт, Авилгын эсрэг хууль, Шүүхий тухай хуулийн нэмэлт, өөрчлөлтөөр Ерөнхийлөгчийн эрх мэдэл хязгаарлагдмал болчихсон. Тиймээс л У.Хүрэлсүх Ерөнхийлөгчийн сонгуульд ач холбогдол өгөх нь багасаж, Сү.Батболдыг Ерөнхийлөгчийн сонгуульд сойх хувилбарыг сонгосон ч байж болох.
Гол нь Ерөнхий сайдыг өнөөдрийн эрх мэдэлд хүрэхэд гол түлхэц болсон хүн нь Сү.Батболд байгаад учир байгаа юм. Ж.Эрдэнэбатын Засгийн газрыг унагаахад Сү.Батболд нэлээд дэмжлэг үзүүлж, У.Хүрэлсүхийг фракцаараа дэмжсэн. Ингээд Ерөнхий сайд болсон даруйдаа түүний ачыг бага багаар хариулж, фракцад нь харьяалагддаг Д.Цогтбаатарыг Гадаад харилцааны сайдаар томилсон. Түүнчлэн Сү.Батболдын хамгийн ойрын хүн гэгдэх П.Одонбаатарыг ТЕГ-ын даргаар томилсон удаатай.
Нам дотроо өөрийн гэсэн бүлэглэлтэй учир Ерөнхийлөгчийн сонгуульд намаасаа нэр дэвшихэд Сү.Батболд рейтингээрээ дээгүүрт бичигдэх нь тодорхой. Гэвч ард түмний итгэлийг хүлээх Ерөнхийлөгч байх нь юу л бол.
Улс төрд хамгийн их эрх ашгийн зөрчилтэй нь түүнийг гээд хэлчихэд хилсдэхгүй болов уу. Оффшор хөрөнгөнөөс нь эхлээд олон зүйл үүнийг батална. 2011 онд түүний төрсөн ах Сү.Бат-Очир оффшорын бүс болох Британийн Виржинийн аралд “MCH finance Limited”, “MCH Lubricants Limited” гэх компанитай нь тогтоогдсоноор Монголын оффшорчидын толгойлогч болсон. Үүгээр ч тогтохгүй гаднынхантай хуйвалдан хүний санаанд багтамгүй хууль бус үйл ажиллагаа явуулж байсан олон баримт бий.
Тухайлбал, эрэн сурвалжлах чиглэлээр мэргэшсэн АНУ-ын “K2 intelligence” гэх компани Сү.Батболдыг Монгол Улсын 26 дахь Ерөнхий сайдаар ажиллаж байх хугацаандаа Солонгосын иргэн Чёон Чү Ёон, түүний эхнэр Хак Сёон нартай хамтран оффшор компани байгуулсан баримтыг ил болгож байсан.
Тухайн үед тэрбээр гаднынхантай хуйвалдан “Эрдэнэт үйлдвэр"-ийн зэсийн баяжмалыг Чёон Чү Ёон, Хак Сёон нарын эзэмшдэг дөрвөн компанид хямд үнээр худалдах гэрээ хийж, цааш нь өндөр үнээр дамлан зардаг сүлжээ бий болгосон гэдэг. Түүнчлэн Сү.Батболд Оюутолгойн гэрээг гаднынханд ашигтай байдлаар шийдвэрлүүлэх үеэр оффшор компаниуд руу нь их хэмжээний мөнгө шилжин орсон гэх баримт ч байдаг юм билээ.
Тэрбээр төрд олон жил суусны ачаар АТГ, ТЕГ-т өөрийн хүмүүсээ шургуулж, бизнесийн салбарт дархан эрхээ эдэлж байна. Тухайлбал, “Тэнгис” кино театр, “Алтай” групп, “Алтай констракшн”, “Алтай гацуурт”, “Ар өвөр алтай”, “Алтай нутгийн хүчтэн” ХХК, “Алтай холдинг” групп, “Алтай кашмер”, “Чингис хаан” цогцолбор, “Чингис” зочид буудал, “Скай” их дэлгүүр, “Стар” телевиз, “Скай” трэйдинг, “Скайтел” групп, “Скай медиа” корпораци, “Е-Mарт”, “Бороо Гоулд” гэх мэт томоохон компани түүний эзэмшилд байх юм. Эрх мэдлээрээ далайлган, бизнесийг жинхэнэ утгаар нь цэцэглэн хөгжүүлсэн гэлтэй. Ийн түүний намтар түүхийг сөхвөл сайнаасаа илүү саар нь их. Сү.Батболд Монгол Улсын Ерөнхийлөгчид хэр тохирох хүн бэ гэх асуултыг уншигч танд үлдээе.
СҮ.БАТБОЛДЫН сүүлчийн тохироо |
|