ЭРГЭЛТ.мн сайт уламжлал ёсоороо өнгөрсөн долоо хоногт улс төр, эдийн засаг, нийгмийн салбарт өрнөсөн онцлох үйл явдлыг тоймлон хүргэж байна. 

БҮХ НИЙТИЙН ХӨЛ ХОРИОГ ТАВ ХОНОГООР СУНГАЖ, БАЯНГОЛ ДҮҮРЭГТ “ТЭГ” ЗОГСОЛТ ХИЙВ

Өнгөрсөн даваа гарагт Засгийн газар ээлжит бусаар хуралдаж энэ сарын 6-нд дуусах байсан хөл хориог дахин тав хоногоор сунгасан юм. Ингэснээр энэ сарын 11-ний өглөөний 06:00 цагаас бүх нийтийн бэлэн байдлын зэргийг бууруулж, зарим худалдаа үйлчилгээний байгууллагыг нээхээр болсон билээ.  Мөн энэ жилийн Цагаан сарын баярыг тэмдэглэхгүй байх шийдвэрийг Засгийн газраас гаргасан юм. Цаашид дотоодод тархсан халдварыг хумиж чадахгүй бол хатуу хөл хорио тогтооно гэдгийг Шадар сайд Я.Содбаатар хэлж байсан. Тэгвэл Баянгол дүүрэг хэсэгчилсэн “тэг” зогсолт хийсэн нь өнгөрсөн долоо хоногийн онцлох үйл явдал байлаа.  Учир нь “тэг” зогсолт хийх тухай иргэдэд ямар нэгэн мэдээлэл өгөөгүй бөгөөд албаны хүмүүс “тэг” зогсолт хийхгүй гэх байр суурийг илэрхийлж байсан. Гэтэл энэ сарын 8-ны өглөө Баянгол дүүргийн V, VI хороонд хөдөлгөөн хязгаарлаж, "тэг" зогсолт хийчихсэн байв. Зайлшгүй ажиллах шаардлагатай 15 салбарынхан хүртэл гэрээсээ гарах боломжгүй болсон юм. Тус хороодын хэд хэдэн байрнаас халдвар голомтлон тархаж байгаа учраас иргэдийг шинжилгээнд хамруулах зайлшгүй шаардлага үүсэж, ийм арга хэмжээ авсан байна. 

17 ЦАГ ХЭЛЭЛЦСЭН ШҮҮХИЙН ТУХАЙ ХУУЛЬ ЭХНИЙ ДАВААГАА ДАВЛАА

Засгийн газраас өргөн мэдүүлсэн Шүүхийн тухай багц хуулийн төслийн анхны хэлэлцүүлгийг УИХ-ын чуулганаар өнгөрсөн долоо хоногт хийлээ. Ерөнхийлөгчийн өргөн мэдүүлсэн Шүүхийн тухай хуулийг МАН-ынхан олонхиороо хэлэлцэхгүй байсан нь түүнийг хуулиа татаж авахад хүргэсэн. Ингээд Ерөнхийлөгчийн боловсруулсан хуулиас зарим нэг заалтыг тусгаж Засгийн газраас өргөн мэдүүлсэн Шүүхийн тухай хуулиа хэлэлцэж эхэлсэн билээ. Уг хуулийн төслийг хэлэлцэх эсэхийг шийдэхээс өмнө УИХ дахь АН-ынхан удаа дараа завсарлага авч, улмаар улс төрийн зарим нэг лобби орж байгааг ажлын хэсгийнхэн хэлж байсан. Тэгвэл өнгөрсөн долоо хоногт УИХ-ын Хууль зүйн байнгын хороо уг хуулийн төслийг 17 цаг хуралдаж хэлэлцсэн байдаг. Ингээд УИХ-ын чуулганаар орж зарчмын зөрүүтэй саналуудад санал хураалгасан юм. Уг хуулийн төслөөр шүүхийн шинэчлэлтийг хийх, шударга ёсыг тогтоох, “шударга бусын хонгилыг нурааж чадна” гэж үзэж буй юм. Харин сөрөг хүчнийхэн гишүүдээс Ерөнхийлөгчийн эрх мэдлийг “булаасан” хууль болсон хэмээн байр сууриа илэрхийлж байлаа. 

УИХ-ЫН ГИШҮҮН Ш.РАДНААСЭД, Д.ӨНӨРБОЛОР НАР АЧАА ТЭЭВРИЙН ОНГОЦООР СОЛОНГОСООС ИРСЭН НЬ ШУУГИАН ТАРИВ

УИХ-ын гишүүн Ш.Раднаасэд, Д.Өнөрболор нар БНСУ-аас ачаа тээврийн онгоцоор ирсэн гэх мэдээлэл өнгөрсөн долоо хоногт шуугиан тарив. Гадаадад гацсан монголчууд эх орондоо ирэх гэж өлсөглөн хүртэл зарлаж байгаа энэ үед УИХ-ын гишүүд нь очер дайраад ирлээ гэх асуудал дэгдсэн. Гэвч УИХ-ын гишүүн Ш.Раднаасэд уг мэдээллийг үгүйсгэсэн бөгөөд 12 дугаар сарын эхээр эх орондоо ирсэн гэх тайлбарыг манай сайтад өгсөн. Мөн УОК-оос уг мэдээллийг үгүйсгэж байсан. Гэвч Гадаад харилцааны яамнаас түүнийг өнгөрсөн долоо хоногт Солонгосоос ирсэн гэдгийг нь хүлээн зөвшөөрсөн юм. УИХ-ын гишүүн Ш.Раднаасэдийн хувьд эхнэрийн биеийн байдлаас шалтгаалж ирэхээр болсон гэх тайлбарыг намынхан болон УОК-д өгсөн ч олон нийтэд оны өмнө ирсэн гэх худал тайлбар өгсөн юм. 

Х.НЯМБААТАРЫН ХОЛИОН БАНТАН БУЮУ ХӨӨН ХЭЛЭЛЦЭХ ХУГАЦААТАЙ ХОЛБООТОЙ ЦЭЦИЙН ДҮГНЭЛТИЙГ ХЭЛЭЛЦЭВ

УИХ-ын гишүүд 2017 онд баталсан Эрүүгийн хуулийн өөрчлөлтийн алдаагаа 2020 оны нэгдүгээр сард Журмын тухай хуулиар засах оролдлого хийсэн нь Үндсэн хууль зөрчсөн үйлдэл болсон. Өнгөрсөн долоо хоног УИХ Үндсэн хуулийн цэцийн 12 дугаар дүгнэлтийг хэлэлцээд хүлээж авсангүй. Нэг ёсондоо өөрсдөө алдаа гаргаснаа амаараа хүлээн зөвшөөрсөн хэдий ч цаасан дээр хүлээн зөвшөөрч чадаагүй юм. Энэ нь Монголын Парламентын түүхэнд ичгэвэртэй зүйл болж байгааг гишүүд хэлж байв. 

Хөөн хэлэлцэх хугацаанд өөрчлөлт оруулсан гэх буруутнаар Хууль зүйн сайд Х.Нямбаатарыг нэрлэж, өнөөх нь өөрийгөө өмөөрсөөр хуралдаан өндөрлөсөн. 2017 оны Эрүүгийн хуулийн өөрчлөлтөөр хөөн хэлэлцэх хугацаанд өөрчлөлт оруулсан нь авлига, албан тушаалын олон хэрэг хаагдаж, ял завших нөхцөл бүрдсэн байв. Ингээд олон нийтийн шүүмжлэл хүртээд эхлэхээрээ алдаагаа засах гэж Х.Нямбаатар нарын гишүүд 2020 оны нэгдүгээр сард Эрүүгийн хуулийг дагаж мөрдөх журмын тухай хуулийг баталж авлига, албан тушаалын хэргийн хөөн хэлэлцэх хугацааг сэргээж шалгахаар болсон нь мөн л сонгуулийн өмнөх шоу болсон. Гэтэл уг хууль Үндсэн хууль зөрчсөн байна гээд дунд суудлын хуралдааны дүгнэлт гарчихсан. Үүний үр дүнд Оюутолгойн хэрэгт холбогдсон С.Баяр, С.Баярцогт, Тавантолгойн хэрэгт холбогдсон М.Энхсайхан нарын арав гаруй хүний хэрэг хэрэгсэхгүй болж мэдэхээр болж байгаа юм. 

ЕРӨНХИЙЛӨГЧ Х.БАТТУЛГА ӨРХ БҮРД НЭГ САЯ ТӨГРӨГ ӨГӨХ САНАЛАА ДАХИН ГАРГАЛАА

Монгол Улсын Ерөнхийлөгч Х.Баттулга өрх бүрд нэг сая төгрөг өгөх санаачлага гаргаад Засгийн газраас дэмжлэг авахгүй байгаа юм. Тэрбээр сая төгрөг олгохдоо 200 мянган төгрөгийг бэлнээр, 800 мянган төгрөгийг зөвхөн үндэсний үйлдвэрлэгчээс архи, согтууруулах ундаа, тамхины төрлөөс бусад бараа, бүтээгдэхүүн худалдан авах тусгай болзол бүхий эрхийн бичиг хэлбэрээр олгох нь зүйтэй гэж үзэж буй. Тэрбээр энэ саналаа он солигдох мөчид үг хэлэхдээ дахин хэлж байсан. Тэгвэл өнгөрсөн долоо хоногт Ерөнхийлөгч Х.Баттулга өрх бүрд нэг сая төгрөг олгох саналаа УИХ-ын тогтоолын төсөл болгон дахин өргөн барилаа. Ингэхдээ санхүүжилтийг нь оффшор бүсээс татагдан орж ирсэн хөрөнгийн эх үүсвэрээр шийдвэрлэх зохицуулалтыг тусгажээ. Оффшор бүсээс орж ирсэн мөнгөн хөрөнгийг Монголбанканд төрийн сангийн тусгай данс нээн байршуулахаар заасан байна.

Ж.ЭРДЭНЭБАТ, Н.НОМТОЙБАЯР НАРТ ХОЛБОГДОХ ХЭРГИЙН ШҮҮХ ХУРАЛ ДАХИН ХОЙШЛОГДОВ

Шүүхээс зургаан жилийн хорих ял авсан Ерөнхий сайд асан Ж.Эрдэнэбатад холбогдох хэргийн гурав дахь шатны шүүх хурал өнгөрсөн баасан гарагт болох байсан ч 7-14 хоногоор хойшлогдов. Олон Улсын Парламентын холбооноос УИХ-ын гишүүн Ж.Эрдэнэбатын эрхийг ноцтой зөрчсөн байна хэмээн дүгнэлт гаргасан байдаг. Улмаар уг асуудалд хэрэг нээж, шалгалтын ажил хийгдэж буй гэх мэдээлэл бий. 

Мөн өнгөрсөн баасан гарагт УИХ-ын гишүүн асан Н.Номтойбаяр нарт холбогдох хэргийн шүүх хурал болох байсан ч хойшлогдсон юм. Хөдөлмөр нийгмийн хамгааллын сайдаар ажиллаж байхдаа эрх мэдэл, албан тушаалын байдлаа урвуулан ашигласан, худал мэдүүлэг өгсөн гэх үндэслэлээр шүүж, 5.5 жилийн хорих ял оноосон. Хэрэгт хамжигчаар оролцсон гэм буруутайд дараах хүмүүсийг тооцож 3-4 жилийн ял оноосон билээ.