Чилид үүссэн эмх замбараагүй байдлыг зохицуулах үүднээс тус улсын Засгийн газар иргэдийнхээ амьжиргааг дэмжихэд чиглэсэн цогц арга хэмжээ боловсруулан Конгрессоор хэлэлцэхээр болжээ. Тус улсын Ерөнхийлөгч Себастьян Пиньера цогц арга хэмжээнд тэтгэвэр нэмэх, цахилгаан эрчим хүчний тарифыг бууруулах, эмчилгээний зардлыг хэсэгчлэн улсаас гаргах, эм бэлдмэлийн үнийг хөнгөлөх, цалингийн доод хэмжээг нэмэх зэрэг багтаж байгааг тодотголоо. Оюутан залуусын эсэргүүцлийн хөдөлгөөнөөс үүдэн хотын метроны үйл ажиллагаа тасалдахад хүрээд буй. Чилийн нийслэл Сантъяго болон бусад хэд хэдэн хотод онц байдал зарлаад байгаа юм.

Метроны тасалбарын үнэ өссөнийг эсэргүүцсэнээс үүдэлтэй жагсаалын үеэр эмх замбараагүй байдал үүсэж, хоёр хүн амиа алдаж, 156 цагдаагийн ажилтан гэмтэж, 300 орчим хүн баривчлагдсан нь  онц байдал зарлахад хүргэсэн.

Эсэргүүцлийн хөдөлгөөнд оролцогчдын олонх нь ахлах сургуулийн сурагч, оюутан байгаа юм. Чилийн Засгийн газраас  метроны  тасалбарыг 1.17 ам.доллароор нэмэх шийдвэр өнгөрсөн сарын эхээр гаргасан. Эрчим хүчний үнэ өндөр, песогийн ханш сул зэргээс үүдэн ийм шийдвэр гаргасан талаар холбогдох албаныхан тухайн үед мэдээлж байв. Гэвч Сантъяго хотын залуус үнэ өссөнийг эрс эсэргүүцэж, хэд хэдэн метроны буудал руу халдаж, хотын томоохон зам, талбайг өнгөрсөн амралтын өдрөөс хойш хаагаад байгаа юм.

Оюутан залуусын эсэргүүцлийн хөдөлгөөнөөс үүдэн хотын метроны үйл ажиллагаа тасалдахад хүрээд буй. Цагдаагийнхан жагсагчдыг тараахын тулд нулимс асгаруулагч хий, бороохой ашиглаж байна. Латин Америкийн хамгийн чинээлэг орны нэгд тооцогддог Чилид сүүлийн жилүүдэд баян, ядуугийн ялгаа нэмэгдэж, амьдралын өртөг өсөх болсон. Тэр дундаа Сантьяго хотод амьдрах өртөг хэт өндөр байгааг иргэд шүүмжилж, эдийн засгийн шинэчлэлт явуулахыг Засгийн газартаа уриалах болсон билээ. Тус улсын Ерөнхийлөгч Пиньера Себастьян хувийн өмч, нийтийн аюулгүй байдлыг хамгаалах үүднээс онц байдал зарлаж байгаагаа өнгөрсөн даваа гарагт мэдэгдээд "Жагсах нэг хэрэг. Танхайрах  өөр хэрэг" гэдгийг анхааруулаад буй. Жагсагчид эмх замбараагүй байдал үүсгэснээс болж, метроны буудлуудад урьдчилсан байдлаар 700 мянган ам.долларын хохирол учраад байгаа аж. 140 км-ын урттай шугам, 130 гаруй зорчигчийн тавцан бүхий Сантъяго хотын метроны систем Латин Америкдаа хамгийн боловсронгуйд тооцогддог.

Эх сурвалж: https://www.bbc.com/news/world-latin-america-50113090