Ерөнхий консул А.Дэлгэрмаа Япон Улсын Гадаад харилцааны яамны Кансай дахь салбарын дарга, Элчин сайд Мисава Ясүши-тай 2026 оны наймдугаар сарын 10-ны өдөр танилцах уулзалт хийв. Ерөнхий консул А.Дэлгэрмаа Монгол Улсын Гадаад харилцааны сайд Б.Батцэцэгийн мэндчилгээг уламжиллаа. Монгол Улс, Япон Улсын Энх тайван, хөгжил цэцэглэлтийн төлөөх тусгай стратегийн түншлэл бүхий л салбарт гүнзгийрэн хөгжиж, иргэд хоорондын нөхөрлөл улам бүр бэхжиж буйг онцлов.

    Цаашид Баруун Японы бүс нутагт сурч, ажиллаж, амьдарч буй болон зорчин яваа иргэдийнхээ хууль ёсны эрх ашгийг хамгаалах, төрийн үйлчилгээг түргэн шуурхай хүргэнэ гэлээ. Мөн иргэдийнхээ үүсгэн байгуулсан холбоо, төрийн бус байгууллагуудын үйл ажиллагааг дэмжиж, хамтран ажиллана гэв. Монголын соёл, урлаг, зан заншлыг сурталчлах, бүс, орон нутаг хоорондын харилцааг хөгжүүлнэ. Иргэдийн харилцан ойлголцол, найрамдал нөхөрлөлийг улам бүр бэхжүүлэх, худалдаа, эдийн засгийн харилцааг тэлэх, хөрөнгө оруулалтыг татах чиглэлд идэвх санаачилгатай ажиллахаа илэрхийлэв.

   Элчин сайд Мисава Ясүши Ерөнхий консулд ажлын амжилт хүсээд, үүрэгт ажлаа эхлүүлэхтэй холбоотой асуудлаар мэдээлэл өгөв. Кансай бүс нутагт үйл ажиллагаа явуулахад бүхий л талаар дэмжиж, нягт хамтран ажиллахаа илэрхийлэв. Мөн энэ үеэр талууд ирэх хугацаанд хэрэгжүүлэх “Намрын баяр” зэрэг арга хэмжээний асуудлаар санал солилцов. 2027 онд тохиох Монгол Улс, Япон Улсын хооронд дипломат харилцаа тогтоосны 55 жилийн ой, Осака дахь Ерөнхий консулын газар байгуулагдсаны 15 жилийн ойг тэмдэглэн өнгөрүүлэхтэй холбогдуулан хамтран ажиллахаар тохиров.