Бүгд Найрамдах Чех Улсын Засгийн газрын өчигдрийн хуралдаанаар 2027 оноос эхлэн эцэг, эхийн тэтгэмжийг (Rodičovský příspěvek) 400,000 чех крон, ихэр хүүхдэд олгох эцэг, эхийн тэтгэмжийг 800,000 чех крон болгон нэмэгдүүлэх шийдвэр гаргалаа.

   Засгийн газрын дээрх шийдвэрийг Бүгд Найрамдах Чех Улсын Парламент хэлэлцэн баталж, Ерөнхийлөгч гарын үсэг зурснаар 2027 оны 1 дүгээр сарын 1-ний өдрөөс эхлэн хүчин төгөлдөр мөрдөгдөж эхэлнэ.

   Түүнчлэн хүүхэд төрөхөөс өмнөх хоёр сарын хугацаанд жирэмсэн эхэд олгох тэтгэмжийг сар бүр 15,000 чех кроноор тогтоохоор шийдвэрлэв. Энэхүү тэтгэмжийг жирэмсний тэтгэмж авдаггүй оюутан болон хөдөлмөр эрхэлдэггүй эхчүүд авах боломжтой бөгөөд шинэ зохицуулалт мөн 2027 оноос хэрэгжиж эхлэх төлөвтэй байна.