“CISM” буюу Дэлхийн цэргийн спортын холбооны 81 дэх удаагийн чуулга уулзалт   Монакогийн Вант Улсад 2026 оны тавдугаар сарын 3-9-ний өдрүүдэд болж байна. Дэлхийн цэргийн спортын холбоо буюу “CISM”-ний 81 дэх Ерөнхий ассамблейн чуулга уулзалтад Дэлхийн цэргийн спортын холбооны гишүүд болох 91 улсын төлөөлөгчид оролцож байгаа юм.

     Тус 81 дэх удаагийн хуралд: Батлан хамгаалах яамны харьяа, зэвсэгт хүчний “Алдар” спорт хорооны дарга, “CISM”-ын Монгол Улсыг хариуцсан Үндэсний ахлах төлөөлөгч, хурандаа Г.Өсөхбаяр, Спорт хорооны захиргааны удирдлагын албаны дарга дэд хурандаа Н.Отгонбаатар, Батлан хамгаалах яамны Гадаад харилцаа, хамтын ажиллагааны газрын мэргэжилтэн хошууч Я.Эрдэнэбилэг нарын бүрэлдэхүүнтэй оролцож байна.

     Энэ удаагийн чуулга уулзалтаар 2025 онд зохион байгуулагдсан тэмцээн уралдааны мэдээ, гүйцэтгэлийн тайлан, 2026 онд зохион байгуулагдах хурал, тэмцээн уралдааны талаар мөн Дэлхийн спортын холбоо “CISM”-ний цаашдын чиг хандлага, тивүүд буюу бүсийн хурал, 2027 онд АНУ-ын Шарлотт хотод зохион байгуулагдах “Зуны цэргийн дэлхийн наадам”-ын талаар тус тус хэлэлцэгдэнэ.

    “CISM”-ийн талаар Дэлхийн цэргийн спортын холбоо болох “CISM” нь 1948 онд байгуулагдсан бөгөөд өнөөдрийн байдлаар тус хүчирхэг холбоонд дэлхийн 142 улс нэгдээд байна. “Спортоор дамжуулан нөхөрлөл” уриан дор улс орнууд, ард түмний хооронд энх тайван, спортын тэмцээн уралдаан, нөхөрлөл зэргийг эрхэмлэн үйл ажиллагааг дэлхийн хэмжээнд өргөн явуулдаг байгууллага юм.