“Парис-2024” олимпын наадмын нээлтийн ёслолын үеэр Италийн шигшээ багаа төлөөлөн тугч хийж явсан өндрийн харайлтын тамирчин Жианмарко Тамбери хуримынхаа бөгжийн Сена мөрөн рүү унагажээ. Харин тэрбээр энэ талаараа нээлтийн дараахан албан ёсны цахим хуудсаараа дамжуулан мэдэгдсэн бөгөөд эхнэрээсээ уучлалт гуйн “Өчигдрийн бүтэлгүйтлийн цаана асар романтик боломж байгаа ч юм бил үү. Хэрэв чи минь хүсвэл хоёул чинийхийг ч гэсэн тэр мөрөн рүү шидье. Бидний хуримын бөгж тэнд хамтдаа үүрд байг. Тэгээд хоёулаа чиний хүсэж байсан шиг хуримын тангаргаа шинэчлээд дахиад гэрлэцгээе” гэсэн утгатай нийтлэл оруулсан байна. Италийн шигшээ багийн тамирчин, олимпын аварга Жианмарко Тамберигийн уг нийтлэл тэр даруйдаа дэлхий даяар түгж, олон нийтийн мэдээллийн хэрэгслээр хосуудыг дахин хуримаа хийхийг олон хүн дэмжин сэтгэгдлээ илэрхийлж буй. Тэгвэл үүнтэй холбоотойгоор Парисын олимпын нээлтээр бөгжөө гээж, эхнэртээ дахин гэрлэх санал тавьсан Италийн өндрийн харайлтын тамирчин Жианмарко Тамбери гэж хэн болохыг танилцуулж байна.

Италийн өндрийн харайлтын тамирчин Жианмарко Тамбери Парисын олимпын нээлтээр хуримын бөгжөө хаяснаас ч өмнө өнгөрсөн Токиогийн олимпоор мөн шуугиан дэгдээж, дэлхийн анхааралд өртөж байв. Тухайлбал, 2021 онд зохион байгуулагдсан “Токио-2020” олимпын наадмын өндрийн харайлтын төрөлд оролцсон Жианмарко Тамбери финалын шатанд Катарын тамирчин Мутаз Эссатай оноо тэнцэж, харайлтаа дахин давтахаар болсон юм. Харин тухайн үед эсрэг тамирчнаа ядарч, цуцсан байхыг мэдсэн Италийн тамирчин шүүгчдэд аваргын алтан медалиа хувааж авч болох эсэх хүсэлт гаргаснаар Жианмарко, Мутаз нар олимпын эв нэгдлийн бэлгэ тэмдэг болон олимпын алтыг хувааж хүртсэн байдаг.

Жианмарко Тамберигийн хувийн амьдралын хувьд тэрбээр 1992 оны зургадугаар сарын 1-нд төрсөн бөгөөд өдгөө 32 настай. Түүнийг бага наснаас нь аав Марко Тамбери нь өндрийн харайлтын спортод бэлтгэж байсан бөгөөд хүүгээ олимпын аварга болсны дараахан ажлаа хүлээлгэн өгч тэтгэвэртээ гарчээ. Харин Жианмарко олимпын алтан медалиа дуулиантай авсны дараагаас карьерынхаа хамгийн дээд амжилтуудыг үзүүлж эхэлжээ. Тодруулбал, Токиогийн олимпоос хойш хоёр жилийн дараа буюу 2023 онд Жианмарко дэлхийн аварга болж, 2024 онд Европын аварга болж, тив, дэлхий, олимпын тэмцээнүүдэд аваргалан дахин олимпод хүч үзэж байгаа нь энэ. Сонирхуулахад, хаа явсан газраа олны анхаарлыг татдаг Жианмарко томоохон тэмцээний сонгон шалгаруулалтаас эхлэн сахлаа бүтэн ургуулж, финалын тэмцээнд үлдвэл ургуулсан сахлынхаа зөвхөн нэг талыг нь авч оролцдогоороо алдартай гэнэ.