“Авьяаслаг монголчууд” шоунд оролцож, жижиг гитар, хүчирхэг хоолой, хэвлүүхэн яриагаараа сонсогч, үзэгчдийн хайрыг татаж байсан Б.Ихэрсувдтай ярилцсан ярилцлагаас онцлох эшлэлийг хүргэж байна. Ярилцлагыг бүрэн эхээр нь энд дарж уншаарай.

“Тухайн үед гэр бүлийнхэндээ тэмцээнд оролцох болсноо хэлээгүй, гитараа үүрч очоод урьдчилсан шалгаруултад оролцсон. Шоунд оролцохоос өмнө гэрийнхэн миний дуулахыг төдийлөн дэмждэггүй байлаа. “Авьяаслаг монголчууд” шоунд амжилттай оролцсоны дараагаас уран бүтээл хийхийг минь дэмждэг болсон”

“The Voice of Mongolia” шоунд их сургуулиа төгссөнийхөө дараа орсон. Тэр үед уран бүтээл хийж эхэлж байсан учраас хүмүүст хүргэж, таниулах хэрэгтэй байсан юм”

“Багадаа “Хэцүү анги” олон ангит киног үздэг, “Хэцүү байна” дуунд дуртай, сонсдог байсан учраас саналыг нь дуртай хүлээн авсан. Хоёр өдрийн дотор дуугаа шиинэчлэн дуулж, бүрэн дуусгасан”

“Багадаа нэлээн хөдөлгөөнтэй, сахилгагүй хүүхэд байсан. Насанд хүрсэн ч багын зангаа тавиагүй, хөдөлгөөнтэй хэвээрээ”

“Цэцэрлэгт байхаасаа урлагт дуртай, ямар л урлагийн тэмцээн байна бүгдэд нь оролцдог байсан. Идэвхтэй оролцсон ч шалгардаггүй байсан болохоор өөрийгөө “Авьяасгүй юм байна” гэж бодож, их гуниглана. Гэхдээ тэр үед ээж минь намайг урамшуулж, дэмждэг байсан болохоор бүр мөсөн шантраагүй”

“Миний амьдралд тохиолдсон зүйл надад ямар мэдрэмж, ямар сургамж өгсөн талаар дуундаа шингээхийг илүү зорьдог”

“Үгээр хэлэмгүй мэдрэмж байх. Орчлон ертөнцөөс тасарч, хийсвэр ертөнцөд очоод хөвж байгаа юм шиг сэтгэлд тухтай, жаргалтай мэдрэмж авдаг”

“Тэр өдөр жаахан тааруу өнгөрсөн байвал дуу хөгжим намайг яг л эмч шиг анагаадаг”

“Би хайраас хамгийн их сэтгэл ханамж мэдэрдэг. Бүх зүйлийг хайрлах хайраас хамгийн гоё мэдрэмж авдаг. Надаас гарсан дуу, аялгуу, үг бүр хайраас үндэслэдэг”

“Өөрийнхөөрөө, дэггүй зан чанар намайг хамгийн сайнаар илэрхийлдэг байх. Мөн зүрхнээс минь хайртай хамт гарч буй дуу хөгжим намайг илэрхийлнэ”