Улсын драмын эрдмийн театрын тайзнаа “Тэнгэрийн хүү” Модун шаньюй төр улсынхаа төлөө хайртай бүхнээ “зольж”, албат цэргүүддээ Түмэн шаньюй эцгээ хороох даалгавар өгч, дутуу бодож, түрхэн зуурт дүрэлзсэн сэтгэлээр хатуу нүгэл үйлдсэн хүүгийнхээ хийсэн хэрэгт итгэн ядахдаа Могол хатан амиа егүүтгэж, Лүүсүү ван, Шунхуй хатан, Арваадай нарын хорон муу санаа эцэст нь биесийг нь отож, үзэсгэлэнт Шагэ, Шива эгч дүүс Модунд эцсээ хүртэл хатан ухаан, уужуу сэтгэлээр хань болж, хавт цэргүүд сонор алдалгүй тулалдсаар хэдийнэ зургаа хонолоо. Энэ бол “Тэнгэрийн хүү” жүжиг.

Бид үүнээс урьд энэхүү жүжгийн талаар "Тэнгэрийн хүү"-гийн хүсэл гэж тэмдэглэсэн бол https://ergelt.mn/news/23/single/47686 энэ удаад Лүүсүү вангийн дүрийг бүтээж буй жүжигчин О.Гэрэлсүхийг онцолж уншигч танд хүргэж байна.

БИДНИЙ ДУНД ЛҮҮСҮҮ ВАНГУУД БИЙ

        Түүний хувьд  хорь гаруй жилийн дараа дахин тайзнаа гарч, “Сычуаны сайн хүн” жүжгийн хивсний худалдаачин, “Анна каренина” жүжгийн Облонский, “Тоглоомчид” жүжгийн архаг мөрийтэй тоглоомчдыг дөнгөх ноёдын нэгт тоглоод байсан бол өдгөө Лүүсүү вангийн дүрийг бүтээж байна. Тэрбээр энэхүү дүрийнхээ талаар “13 жилийн өмнө Б.Цогнэмэхийн зохиол “Тэнгэрийн хүү”-г тайзнаа сонгодог маягаар тавьж байсан бол энэ удаад шинэчилсэн найруулгаар буюу цоо шинээр дахин хүргэж байна. Миний хувьд Лүүсүү вангийн дүрд ажиллахдаа Ардын жүжигчин, Хөдөлмөрийн баатар Д.Цэрэндагва гуайн бүтээсэн Лүүсүү ванг бодож ажилласан. Анх найруулагч дүр хуваарилж байхдаа эрчтэй хүчтэй, жүжгийн гол үйл явдлыг гол хөдөлгөгч хүч нь Лүүсүү ван. Лүүсүү ван байхгүй бол энэ бүхэн эхлэхгүй, энэ түүх хөгжихгүй, энэ жүжгийг бид үзэх шаардлагагүй, үйл явдал хэзээ ч тохиолдохгүй” гэж хэлсэн нь дүрээ гаргахад их тус болсон" гэж ярьсан юм.

     Атгаг санаа агуулж, амь биедээ ашигтайг эрэн хайж, төрд санаархагчид өнөөдрийн нийгэмд олон. Ерөөс Лүүсүү вангаар дүүрэн ахуйд л бид амьдарч байна гэж хэлэхэд хилсдэхгүй байх. Төрсөн дүү нь хааны бага хатан болсноор тэр хаан ширээ, хамаг бүхэнд шунаж, өөрөө хүрдэггүй юм аа гэхэд зээ хүү Арваадайгаа сэнтийд суулгаж, Модуныг унагах хорон санааг бие, сэтгэлдээ тээж, дүүгээрээ дамжуулан их хааныг “хөдөлгөж” эхэлдэг. Гэсэн ч Модун хүү тэдний санааг илтэд мэдэх учир эцэстээ муу санааныхаа “тор”-нд өөрсдөө унаж, үгүйрдэг. 

-ТЭР-

      Тэр театрын тайзнаа анхны Ромеогийн дүрээр тайз, дэлгэцийн урлагийн хаалгыг цэлийтэл нээн орж ирснээс хойш хэдийнэ 26 жил болжээ. Тэрбээр театрт “Хаан түүх”, “Тамын дурлал”, “Чөлөөт хос”, “Би эндээс явахгүй” зэрэг хорь гаруй бүтээлийн гол болон туслах дүрд тоглосноос гол орой нь Ромео. 

-ЛАРЬДМААГИЙН “НӨХӨР”