Улсынхаа төлөө аавыгаа хөнөөж, аавынхаа бага хатныг, ахтай нь үгүй хийж, амьнаасаа хайртай Шагэ хатныг нь усанд живүүлсэн харийн дайсан мэт хандах төрсөн дүүгээ ч устгаж, хайртай хатнаа харуусан санагалзахдаа түүний дүү Шиваг хатан буулгадаг ч Дунху Улсын хүсэлтийн дагуу аргагүйн эрхэнд хатнаа өгдөг. Ингэж хайртай бүхнээсээ хагацаж, хамгийн үнэтэй гэсэн бүхнээ дайсны талд "барьж", улсынхаа төлөө чин сэтгэлээ зориулсан хүү бол Модун Шаньюй. Биднийг өөрийн гэсэн улс орон, газар нутагтай байлгах хэтийн зорилгодоо хүрэхийн тулд өөрийн гэх бүхнээ зольж, барсан түүхэн баатар.

      Магадгүй тэр аав, ээжийнхээ үгэнд орж, дүүтэйгээ эвтэй байж, гэр бүлийнхэнтэйгээ санаа нэгтэй байсан бол энэ бүхэн эсэргээрээ эргэх байсан. Гэхдээ баатар гэдэг зүгээр ч нэг төрдөггүй. Тэр гарцаагүй улс эх орноо, хайртай бүхнээ хамгаалж, тэдний төлөө бүхнээ зориулах хувь тавилантай байдаг. Гэхдээ хүн нэгд үнэнч явахад, нөгөө нь золиослогдож, нэг сонголт хийхэд, нөгөө нь орхигддог хяслантай. Модуны хувьд энэ сорилт дэндүү хүчтэй бууж, хайртай бүхэн нь түүний улсаа аврах инж бэлэг л болж байсан нь хатуу мөртлөө аргагүй хувь тавилан байв.

      Хүн өөрөөсөө ч илүү энхрийлэн хайрлах бүхнээ хахир хүйтэн сэтгэлтэй харь дайснуудад цувуулан өгч, олон, сар жилээр тэднийгээ бодон сэтгэл шаналж явна гэдэг амьдрахаас ч хэцүү. Гэхдээ юу ч болж байсан улсаа зарахгүй гэдэг хатуу зарчим л түүнийг амьдруулж, зорьсон зорилгодоо эргэлтгүйгээр хүрэхээр тэмүүлнэ. Анх энэ зохиолыг арван жилдээ уран зохиолын хичээл дээр үзээд, эх орон, улс гэдэг ээж, ааваас илүү үнэтэй байдаг байх нь. Өөрийн гэх бүхнээсээ нүүр буруулж, энэ улсын төлөө эцсээ хүртэл үнэнч явсан Модун Шаньюйг мартах аргагүйгээ ойлгосон. Гэтэл удаа ч үгүй Улсын драмын эрдмийн театрын уран бүтээлчид тайзнаа жүжиг болгон тавихад нь "Одоо л Модуныг хүн бүр ойлгож, түүний хүсэл зорилгыг сонсох нь" гэж бодогдож билээ.