БИ МОНГОЛ УЛСЫН ТҮҮХИЙГ ЗУРЖ ЯВАА ХҮН

            Зураач Д.Чулуунбат “Тэнгэр” хэмээх үзэсгэлэнгээ энэ сарын 5-15-нд дэлгэх гэж байгаа билээ. "Тэнгэрлэг заяат монголчуудынхаа хүчирхэг оюун санаа, амьдрал, замналыг уран бүтээлээрээ дамжуулан хүмүүст харуулж, мэдрүүлэхийг зорьж байна" хэмээн ярих түүнийг бид энэ удаагийн “Уран бүтээлчийн цаг” буландаа урьж, цөөн хором ярилцлаа.

-Сайн байна уу. Удахгүй нээх үзэсгэлэнгийнхээ онцлогийн талаар хэлж өгөөч?

            -Тэнгэр заяат монголчууддаа зориулан үзэсгэлэнгээ “Тэнгэр” гэж нэрлэсэн. Бид хэн байснаа санах хэрэгтэй, түүхээ мэдвэл ирээдүйгээ мэднэ шүү дээ. Энэ удаагийн үзэсгэлэндээ байгалийн болон түүхэн зургуудаа дэлгэж байгаа.

            Би 27 дахь жилдээ зурж болсон байна. Гэхдээ энэ хугацаанд гаднын оронд үзэсгэлэн гаргаж байснаас эх орондоо дэлгэж байгаагүй. Уран бүтээл гэдэг уран бүтээлч нь орчлонгоос явсан ч үлддэг шүү дээ. Би  энэ удаа нэг ёсондоо ард түмэнд “Ийм зураач Монголд байдаг шүү” гэдгийг л хэлэхийг зорьж байгаа. Бас хүмүүс миний зургийг хараад гоо сайхан, яруу тансагийг мэдрээсэй. Нийгэм арай өөр болсон байх гэж найдаж байна аа.

-Та дэлхийн хэд хэдэн оронд үзэсгэлэнгээ дэлгэсэн гэлээ. Ер нь манай улсын уран зураг, зураачид дэлхийд хэр үнэлэгддэг юм бэ?

            -Бид л дотроо нэгнээ төдийлөн үнэлдэггүй болохоос дэлхий Монгол уран бүтээлчийн бүтээлийг биширдэг шүү дээ. Тэр байтугай түүхэн сэдэвт зургуудын маш их шагшин магтдаг. Гэхдээ миний хувьд зургаа гаднын зах зээлд борлуулахаас илүүтэй эх орондоо байлгаж, хойч үедээ үлдээхийг хүсдэг.

-Та зурагтаа ямар санааг түлхүү тусгаж өгөхийг зорьдог вэ?

            -Энэ нийгэмд хэлмээр, шүүмжилмээр зүйл дэндүү олон шүү дээ. Гэхдээ үүнийг шүүмжлэхдээ талбай дээр гарч жагсаад,түгжирч явахдаа нэгнийгээ доромжлоод л нийгэм сайхан болохгүй. Хүн бүр тэгж эсэргүүцэх ч шаардлагагүй. Би уран бүтээлч хүн бүтээлээрээ тэмцэнэ. Сайн бүтээл хийж ард түмнийг оюун санаагаар эмчилж, өөрчлөхийг л зорьдог.

-Анх хэрхэн уран зурагтай амьдралаа холбож байв?

            -Хүүхэд бүр  бага байхдаа  өөр өөрсдийн төсөөлөл, мэдрэмжээрээ зураг зурж, үүнийгээ гэр бүлд тайлбарладаг шүү дээ. Би тэдний адил эхэлсэн. Өвөөгийн маань урласан сийлбэр, зурсан зургууд манайд их байдаг. Эмээ минь надад үзүүлээд, “Өвөө чинь ийм хүн байсан” гэж их ярьж өгдөг байлаа. Тэгж явсаар илүү дурлаж, урлагийн удмын үргэлжлүүлээд явж байна даа.

Уран бүтээл бүтэхийг би хүүхэд бүрэлдэхтэй зүйрлэдэг 

-Нэг уран бүтээл гаргах хугацаа гэж байдаг уу, таны хамгийн удаан зурсан зураг юу вэ?

            -Уран бүтээл бүтэхийг би хүүхэд бүрэлдэхтэй зүйрлэдэг юм. Эх хүн үрээ төрүүлэх гэж ямар их зүйлийг туулдаг билээ дээ. Сайн бүтээл  тэгж л төрдөг. Мөн сайхан сэтгэлээс сайхан бүтээл төрнө шүү дээ.

-Таны бусад зураачаас ялгарах онцлог юу байх бол?

            -Багш минь надад “Өөрийнхөө бүтээлийг хамгийн хатуу шүүмжил” гэж захидаг. Би өөрийнхөө зургийг хамгийн их шүүмжилж, муу болсон зургаа муугаа санах гэж хадгалдаг даа. Гэхдээ би дотоод хүндээ хэзээ ч хатуурхдаггүй. Хүн өөртөө хатуурхаад ирэхээрээ гэр бүлдээ, гэр бүлдээ хатуурхаад ирэхээрээ нийгэм рүү чулуу шиддэг.  

-Ярилцсанд баярлалаа.

            -Баярлалаа. 

Зураач Д.Чулуунбаатарын зарим зургаас танилцуулж байна.