Улсын хилээр их хэмжээний мансууруулах бодис хууль бусаар нэвтрүүлсэн бүлэг этгээдийг Тагнуулын байгууллагаас  илрүүлж, үйл ажиллагааг нь таслан зогсоожээ. Тодруулбал, энэ сарын 1-нд иргэн С, Н, Б нар өндөр тунтай мансууруулах бодис болох метамфетаминыг шингэн хэлбэрт хувиргаж, улсын хилээр нэвтрүүлсэн гэмт хэрэг үйлдсэн нь тогтоогджээ. Энэ нь Монгол Улсад “шингэн мөс” хэмээх мансууруулах, сэтгэцэд нөлөөлөх бодисыг илрүүлж, таслан зогсоосон анхны тохиолдол болсон байна.

    Сүүлийн жилүүдэд мансууруулах, сэтгэцэд нөлөөт бодисыг синтетик аргаар боловсруулахаас гадна хууль хяналтын байгууллагаас нуун далдлах зорилгоор сав, баглаа боодлыг өөрчлөх, бараа бүтээгдэхүүнд шингээх, шингэн хэлбэрт шилжүүлж, иргэдэд дайвар ачаа өгөх байдлаар гэмт хэргийн хохирогч болгох тохиолдол гарсаар байна. Мөн мансууруулах бодисыг шингэн хэлбэрт шилжүүлж, хил дамнуулан худалдаалах тохиолдол нэмэгдэх хандлагатай байгааг олон улсын хууль хяналтын байгууллагаас анхааруулж байна. Тиймээс иргэд та бүхнийг бусдаас бүх төрлийн бараа бүтээгдэхүүнийг дайвар байдлаар авахгүй байхыг сэрэмжлүүлж байна.