НИТХ-ЫН ДАРГА Д.ИХБАЯРЫН ҮЕЭЛ НИЙСЛЭЛИЙН ТЕНДЕРҮҮДЭД ТОЛГОЙ ЦОХИЖ БАЙНА

Б. Цогтбаяр:
Эрэн сурвалжлах

2026-05-19, 35

Ерөнхий сайд Н.Учрал “Төсөл, тендерийн хулгай хэрээс хэтэрлээ” гэж ууртайгаар мэдэгдэж, улмаар Х.Нямбаатарыг хотоос хөөсөн. Тэгмэгцээ Х.Нямбаатарын шалгаруулсан төсөл, тендер нэг бүрийг нарийвчилж шалгахыг гурван үсэгтэй гурван газарт үүрэг болгосон. Үндсэндээ Х.Нямбаатар хотоос хөөгдөөд зогсохгүй, халаас хэтэвч, богц аранзаа бүрэн нэгжүүлэхээр болчихоод буй. Ямартай ч одоогоор нэг халааснаас нь нөөцийн махны асуудал цухуйж байгаа. Хэрвээ түрийвчнээс нь туулын замын төсөв, богцноос нь бордюрын мөнгө гарч ирвэл уушгины гурав байтугай гучин судастай байгаад ч улс төрийн карьераа үргэлжлүүлж чадахгүй л байх болов уу.

Гол асуудалдаа оръё. Хотын төсөл, тендерийн хулгай хэрээс хэтэрснийг хөмсөг зангидан ярьж, ял асуухыг хууль хяналтынханд үүрэгдсэн Ерөнхий сайд Н.Учралын өөрийнх нь унаган багын найз, улс төрийн багийн хамтрагч Д.Ихбаяр НИТХ-ын даргаар саяхан томилогдсон. Судлаад үзэхээр, НИТХ-ын дарга Д.Ихбаярыг анх НИТХ-д орж ирснээс хойш үеэл нь нийслэлээс 30 гаруй тэрбум төгрөгийн тендер авчээ.

Тодруулбал, НИТХ-ын дарга Д.Ихбаярын ээж Ж.Цэцэгээгийн төрсөн дүү нь Ж.Наранцэцэг гэж эмэгтэй бий. Харин Ж.Наранцэцэгийн хүүг Д.Одхүү гэдэг. Сэлэнгэ аймгийн Баруунбүрэн сумын уугуул гэж цоллуулдаг, сүүлийн хэдэн жил хурдан моринд мөнгө хайрлахгүй цацдаг болсон уяач залуу бий. Хэд хоногийн өмнө л гэхэд “Дүнжингаравын хурд-2026”-д эрлийз үрээгээ аман хүзүүдүүлсэн.

НИТХ-ын дарга Д.Ихбаяр үеэл Д.Одхүүтэйгээ нас чацуу, нэгэн үед Ерөнхий сайд Н.Учралын удирддаг “YES Мongolia” ТББ-д хамтдаа зүтгэж явсан, нэмээд НИТХ-ын сонгуульд өрсөлдөх Д.Ихбаярын санхүүжилтийг Д.Одхүү нь босгож өгсөн зэргээр тун ч дотно.

Хамгийн гол нь, Д.Ихбаярыг 2020 онд НИТХ-ын төлөөлөгч бөгөөд Хотын дарга Д.Сумъяабазарын орлогч болсны дараагаас үеэл Д.Одхүүгийнх нь “Бүрэн-Одод” ХХК нийслэлийн том тендерүүдэд оролцдог, тэгээд төвөггүй шалгардаг болжээ.

Тухайлбал, НИТХ-ын дарга Д.Ихбаярын үеэл Д.Одхүүгийн “Бүрэн-Одод” ХХК нь 2021-2026 онд

- Баянгол дүүргийн 24-р хороонд 960 хүүхдийн сургууль барих 18 тэрбум төгрөгийн тендер

- Баянгол дүүргийн 20-р хороонд Наркологийн эмнэлэг барих 10.5 тэрбум төгрөгийн тендер

- Сонгинохайрхан дүүргийн Эрүүл мэндийн төвийн их засварын 4.4 тэрбум төгрөгийн тендер

- Сонгинохайрхан дүүргийн 37-р хорооны цогцолбор барилгын 3.3 тэрбум төгрөгийн тендер

- Хан-Уул дүүргийн Иргэдийн хөгжлийн төвийн барилгын 2.2 тэрбум төгрөгийн тендер

- Сонгинохайрхан дүүргийн 37-р хорооны цогцолбор барилгын дуусгалын 1.5 тэрбум төгрөгийн тендер

- Чингэлтэй дүүргийн хэмжээнд тохижилтын ажил хийх 400 сая төгрөгийн тендер

- Сонгинохайрхан дүүргийн хэмжээнд сонгуулийн сурталчилгааны самбар байрлуулах 391 сая төгрөгийн тендерт тус тус шалгарсан байна.

Дээрх тендерүүдээс анзаарвал, Д.Одхүүгийн “Бүрэн-Одод” ХХК нь Баянгол дүүргээс л гэхэд 28.5 тэрбум төгрөгийн тендер авчихсан байна. Гэтэл НИТХ-ын дарга Д.Ихбаяр 2020, 2024 онд Баянгол дүүргээс нэр дэвшиж НИТХ-ын төлөөлөгчөөр дараалан сонгогдсон. Өөрөөр хэлбэл, Д.Ихбаярын өөрийнх нь дараалан сонгогдож дархлагдсан тойрог буюу Баянгол дүүргийн 28.5 тэрбум төгрөгийн хоёр том тендерийг үеэл Д.Одхүүгийнх нь “Бүрэн-Одод” ХХК авчихсан байна гэсэн үг. Энэхүү 28.5 тэрбум төгрөгийн хоёр тендерийн гэрээг Д.Ихбаярын үеэл Д.Одхүүтэй байгуулсан Д.Мөнхбат өчигдөр Хотын даргын үүрэг гүйцэтгэгчээр томилогдсоныг дурдах нь зүйтэй.

Товчхондоо, хууль хяналтынхан хотын төсөл, тендерүүдийг шалгахдаа Ерөнхий сайд Н.Учралын өөрийнх нь найз, НИТХ-ын дарга Д.Ихбаярыг нийслэлээс 30 гаруй тэрбум төгрөгийн тендер авсан үеэл Д.Одхүүтэй нь хамт шалгах нь зүйтэй бололтой.

ҮРГЭЛЖЛЭЛ БИЙ...

НИТХ-ЫН ДАРГА Д.ИХБАЯРЫН ҮЕЭЛ НИЙСЛЭЛИЙН ТЕНДЕРҮҮДЭД ТОЛГОЙ ЦОХИЖ БАЙНА

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.