Бадминтоны 23 дахь удаагийн насанд хүрэгчдийн улсын аварга шалгаруулах болж өндөрлөв. Тус УАШТ-д  Улаанбаатар хот, хөдөө орон нутгийн 15 клубийн шилдэг 110 тамирчин өрсөлдсөн юм. УАШТ-ий насанд хүрэгчдийн “А” ангиллын эмэгтэйчүүдийн ганцаарчилсан төрөлд  алтан медаль хүртсэн Дархан-Уул аймгийн өсвөрийн шигшээ багийн тамирчин Ц.Энхлэнтэй ярилцлаа. Тэрбээр 2022-2026 оны УАШТ-нд таван жил дарааллан ганцаарчилсан төрөлд алтан медаль хүртээд байна. Мөн хосын төрөлд алт, мөнгөн медальтай. 2024 онд Казахстан Улсад болсон Төв Азийн аварга шалгаруулах тэмцээнээс багийн төрөлд хүрэл медаль, холимог хосын төрөлд хүрэл медаль хүртсэн. 2025 онд Узбекистан Улсад болсон Төв Азийн аварга шалгаруулах тэмцээнээс багийн төрөлд хүрэл медаль, дан хос төрөлд хүрэл медаль хүртэж байсан.

-Бадминтоны 2026 оны Монгол Улсын насанд хүрэгчдийн улсын аварга шалгаруулах тэмцээнд түрүүлсэнд баяр хүргэе.

    -Маш их баярлалаа. УАШТ-д түрүүлсэн маань багшийн маань хичээл зүтгэл, хүч хөдөлмөр их байлаа. Хувьтөгөлдөр багшдаа баярлалаа гэж хэлмээр байна.

-Миний дүү өөрийгөө манай уншигчдад танилцуулахгүй юу?

    -Намайг Цэлмэг-Одын Энхлэн гэдэг.

-Аль аймаг, хотод төрсөн хүүхэд вэ?

     -Би Дархан-Уул аймгийн Дархан хотод төрж, өссөн.

– Аль сургуулийн хэддүгээр ангийн сурагч вэ?

      -Дархан-Уул аймгийн ерөнхий боловсролын “Од” цогцолбор дунд сургуулийн Г.Энхтуяа багштай 10-ын “2” дугаар ангийн сурагч байгаа.

–Яагаад бадминтоны спортыг сонгож хичээллэх болов?

     -Манай эмээ маань анх бадминтоны спортыг Дархан-Уул аймагт хөгжүүлсэн хүн бий. Дархан хотод анхны секц, дугуйлан хичээллүүлж эхэлсэн. Эмээгээ дагаж бэлтгэл рүү нь хамт их явдаг байлаа. Тэр л үеэс энэ спортод дур сонирхолтой болсон.

–Бадминтоны спорт Дархан хотод хөгжөөд хэдэн жил болж байгаа вэ?

      -Миний санаж байгаагаар Дархан хотод 2011 оноос эхэлж хөгжсөн. Тэгэхээр Дарханд бадмитоны спорт хөгжөөд 15 жил болж байгаа юм уу даа.

–Бадминтоны спортоос өмнө өөр спортын төрлөөр хичээллэж байсан уу?

       -Би дөрвөн настай байхдаа анх удаа бадмитон тоглож, хичээллэж үзсэн. Бараг хичээллэж эхэлсэн гэж хэлж болох байх. Надад бадминтон их сонирхолтой санагдаж татагдсан юм. Харин эмээ маань бадминтоноос өмнө талбайн тенниссээр хичээллэх хэрэгтэй.  Дараа нь бадминтон руу орж болно гэсэн. Талбайн теннисээр Дархан-Уул аймгийн аварга шалгаруулах тэмцээний алт, мөнгө, хүрэл медальтай.  2017 онд УАШТ-ээс хүрэл медаль авч байсан. Талбайн теннисний Х.Батбаяр багшдаа баярлаж явдаг шүү.

-Одоо ямар клубийн, хэн багшийн удирдлага дор бэлтгэл, сургуулилалтаа хийж байгаа вэ?

      -Би одоо “Дархан-Од” клубийн дасгалжуулагч Б.Хувьтөгөлдөр багшийн удирдлага дор бэлтгэл сургуулилалтаа хийдэг.

 – Бадминтоны спортоор хэд дэх жилдээ хичээллэж байгаа вэ?

         -Бадминтоны спортоор хичээллээд найман жил болж байна. Анх албан ёсоор 2018 оноос бадминтоноор хичээллэж эхэлсэн юм.

 -Спортын ямар зэрэг, цолтой тамирчин бэ?

      -Бадминтоны спортын нэгдүгээр зэрэгтэй. Ер нь Монгол Улсын спортын дэд мастерын болзолоо хангачихсан байгаа.

–Бадминтоны спортыг анх сонгох үед аав, ээж, гэр орныхон нь эсэргүүцэж байсан уу?

     -Манай аав, ээж хоёр спортод их дуртай хүмүүс байдаг. Тийм болохоор их дэмждэг. Намайг хичээл, бэлтгэл, тэмцээн уралдаан гээд завгүй явах үед үргэлж надад анхаарал тавьж, сэтгэл, санаагаар дэмждэг. Намайг хайр халамжаар дутаадаггүй аав ээждээ хайртай шүү.

– Бадминтоны спортоор хичээллэсэн үеэс хойш ямар эерэг өөрчлөлтүүд гарсан бэ?

      -Спортоор хичээллэж эхэлсэн үеэс хойш бие бялдрын ерөнхий хөгжил сайжирсан. Мөн хурд, хүч, уян хатан чанар, шилжилт, хөдөлгөөн, анхаарал төвлөрөлт,  тэсвэр тэвчээр, сэтгэл зүйгээ удирдах гээд олон зүйлд суралцсан.

–Бадминтон хэр эрсдэл өндөртэй спорт вэ?

      -Бадминтоны спорт хурд их шаарддаг, огцом эргэлт, үсрэлт ихтэй учраас хөл гэмтэх магадлал бий. Тоглолт хийхийн өмнө биеэ сайн халааж хэрэгтэй.  Бие халаалтыг тогтмол хийдэг тамирчинд эрсдэл байхгүй.

  –Бадминтоны спортоор хичээллэсэн үеэс хойших томоохон амжилтаасаа сонирхуулахгүй юу?

      -Би 2022-2026 оны УАШТ-нд таван жил дарааллан ганцаарчилсан төрөлд алтан медаль авсан. Мөн хосын төрөлд алт, мөнгөн медальтай. 2024 онд Казахстан Улсад болсон Төв Азийн аварга шалгаруулах тэмцээнээс багийн төрөлд хүрэл медаль, холимог хосын төрөлд хүрэл медаль хүртсэн. 2025 онд Узбекистан Улсад болсон Төв Азийн аварга шалгаруулах тэмцээнээс багийн төрөлд хүрэл медаль, дан хосын төрөлд хүрэл медаль хүртэж байсан.

-Чөлөөт цагаараа  бадминтоноос гадна өөр юу хийх дуртай вэ?

     -Чөлөөт цагаараа гэр бүлээрээ хөдөө явах гоё бадаг. Мөн найзуудтайгаа уулзах, хөгжим сонсох дуртай.

–Сэтгэлд тань хоногшин үлдсэн хамгийн сайхан дурсамж үлдээсэн ямар тэмцээн байдаг вэ?

   -Бүх л тэмцээн дурсамж ихтэй гоё санагддаг. Казахстан Улсад төрийн далбаагаа мандуулж төрийн дууллаа эгшиглүүлж байхад их гоё байсан даа.

-Одоо дараагийн оролцох ямар тэмцээнүүд хүлээж байгаа вэ?

    -Одоо 2026 оны багийн УАШТ,  мөн Азийн аварга шалгаруулах тэмцээн, дэлхийн аварга гээд томоохон тэмцээнд оролцох зорилготой байгаа.