Дорнод аймгийн хилийн цэргийн 0132 дугаар ангийн долоон байлдагч эрүүл мэндийн шалтгааны улмаас өнгөрсөн долоо хоногт халагдсан. Мөн тэднийг дэд ахлагч Б.Тэмүжин гэгч зодож, дарамталдаг байсны улмаас хоёр байлдагч хагалгаанд орох заалттай ирсэн гэх мэдээлэл бий.  Энэ талаар албаны хүмүүсээс тодрууллаа.

ХХЕГ-ЫН ХЭВЛЭЛ МЭДЭЭЛЛИЙН АЛБАНЫ ДАРГА У.ПҮРЭВСҮРЭН: БАЙЛДАГЧ НАРЫГ ЗОДСОН ЭСЭХИЙГ ОРОН НУТГИЙН ЦАГДААГИЙН ГАЗРААС ШАЛГАЖ БАЙГАА

       Аравхан хоногийн дотор хилийн цэргийн 0132 дугаар ангиас долоон байлдагчийг эрүүл мэндийн шалтгааны улмаас халсан гэх асуудлыг ХХЕГ-ын Хэвлэлийн албаны дарга У.Пүрэвсүрэнгээс тодрууллаа. Тэрбээр “Хилийн цэргийн 0132 дугаар ангийн байлдагч нарыг эрүүл мэндийн шалтгааны улмаас буцаасан нь үнэн. Долоон байлдагчийн хоёр нь эмчилгээний заалттай буцсан. Өөрөөр хэлбэл, тэднийг давтан үзлэгт оруулахад цэргийн алба хаах боломжгүй гэдэг нь үзлэг, шинжилгээний явцад тодорхой болсон. Энэ талаар эмч нар болон цагдаагийн байгууллагаас нэгдсэн мэдээлэл өгөх байх. Эмнэлэгт хэвтэн эмчлүүлэх шаардлагатай байгаа байлдагч нарыг зодсон эсэх асуудлыг орон нутгийн цагдаагийн газраас шалгаж байгаа. Бусдад зодуулсны улмаас эрүү нь хугарсан гэх байлдагч жагсаалын үеэр ухаан алдаж унасан болох нь хяналтын камерийн бичлэгт үлдсэн байгаа. Энэ нь бусдад зодуулаагүй болох нотлох баримт болох байх. Эрүүл мэндийн шалтгааны улмаас буцсан байлдагч нарыг олон нийт бусдад зодуулсан гэдэг байдлаар хүлээн авч байна. Энэ нь улсын тусгаар тогтнол, хилийн цэргийн хүчийг султгаж буй сөрөг үр дагавартай” гэсэн юм. 

 0132 ДУГААР АНГИЙН ЗАХИРАГЧ, ХУРАНДАА Б.ГАНТӨМӨР: МАНАЙ АНГИД Б.ТЭМҮЖИН ГЭХ ДЭД АХЛАГЧ БАЙДАГ НЬ ҮНЭН. ХАРИН ГЕНЕРАЛЫН ХҮҮХЭД БИШ

      Харин тус хэргийн талаар 0132 дугаар ангийн захирагч, хурандаа Б.Гантөмөрөөс тодрууллаа. Тэрбээр өнгөрсөн амралтын өдөр “Манай ангиас халагдсан цэргийн долоон алба хаагч нь Засгийн газрын 140 дүгээр тогтоолоор батлагдсан эрүүл мэндээс шалтгаалах өвчний улмаас цэргийн алба хаах боломжгүй байсан. Тиймээс тэднийг халах саналыг ХХЕГ хүргүүлсэн. Тухайлбал, венийн судасны үрэвсэл, хамрын хөндийн идээт үрэвсэл, зүрхний хэм алдалт, аутизм болон сэтгэл зүйчийн дүгнэлтээр халах саналтай хүргүүлсэн. Уг мэдээлэлд дурдагдснаар байлдагчид хүч хэрэглэсэн харилцааны зөрчил гарсан гэх асуудлаар дотоод хяналт шалгалт явуулсан. Шалгалтын үеэр алба хаагчид хүч хэрэглэсэн зүйл тогтоогдоогүй. Мөн цагдаагийн байгууллагад хандаж, тухайн нөхцөл байдлыг тогтоолгохоор шалгалтын ажиллагаа үргэлжилж байгаа. Тухайн алба хаагчийг ухаан алдаж унах үед нь эмнэлэгийн анхан шатны тусламж үзүүлэн Бүсийн оношилгоо эмчилгээний төвд хүргүүлсэн. Тухайн алба хаагчийг зодсон гэх асуудлаар хамт байсан байлдагч нараас тодорхойлолт авахад зодсон нөхцөл байдал тогтоогдоогүй. Мөн генералын хүү Т гэх алба хаагч манай ангид байдаггүй. Энэ бол ташаа мэдээлэл” гэсэн билээ. Харин түүнээс шалгалтын ажиллагаа хэрхэн үргэлжилж байгаа талаар тодруулахад “Би өчигдөр албан ёсны тайлбар өгсөн. Одоогийн байдлаар цагдаагийн газраас шалгалтын ажиллагааг үргэлжилж байгаа учир нэмэлт мэдээлэл өгөх боломжгүй байна гэлээ. Манай байнгын бүрэлдэхүүнд Б.Тэмүжин гэдэг дэд ахлагч бий. Харин генералын хүүхэд биш. Түүнийг бусдыг зодсон эсэхийг цагдаагийн байгууллагаас шалгана” гэлээ.

БУСДЫГ ЯРГАЛЖ, ЗОДДОГ ГЭХ Б.ТЭМҮЖИН ГЭЖ ХЭН БЭ

        Б.Тэмүжин нь өөрийгөө генералын хүү хэмээн томорч, шинэ цэргүүдийг “Хаана цохиулахаа өөрөө мэд” хэмээн дарамталж, зоддог гэх. Тиймээс Дорнод аймгийн 0132 дугаар ангиас халагдсан долоон байлдагчийг зодсон гэх асуудалд холбогдоод байгаа билээ. Тэрбээр дэд ахлагч, салааны орлогч цолтой. Мөн түүний өвөө нь генерал цолтой гэх мэдээлэл бий. Түүнийг бусдыг зодож, дарамталсан эсэхийг орон нутгийн цагдаагийн байгууллагаас шалгаж байгаа аж.

0132 ДУГААР АНГИАС ХАЛАГДСАН Д: БИ ЭРҮҮЛ МЭНДИЙН ШАЛТГААНЫ УЛМААС ХОЁР ДАХЬ УДААГАА ХАЛАГДАЖ БАЙГАА

-Чи ямар шалтгааны улмаас цэргийн ангиасаа халагдаад ирсэн юм бэ. Үнэхээр эрүүл мэндийн асуудал байсан уу?

     -Би тавдугаар сарын 3-нд хоёр дахь удаагаа цэрэгт татагдсан юм. Хилийн цэргийн 0132 дугаар ангиас эрүүл мэндийн шалтгааны улмаас дахин халагдчихлаа. Өнгөрсөн жил тангаргаа өргөхөөс хэдхэн хоногийн өмнө халагдаж байсан юм. Би цэрэгт явах сонирхолтой болохоор эрүүл мэндийн багахан шалтгаантай ч гуйсаар байгаад цэрэгт явчихдаг юм. Тэгээд давтан үзлэгт тэнцэхгүй болохоор халагдчихдаг.

-Чамтай хамт халагдсан зургаан цэрэг мөн эрүүл мэндийн шалтгааны улмаас халагдсан уу. Зарим нь бусдад зодуулж, хүнд гэмтсэн гэх мэдээлэл гарсан?

     -Надтай хамт халагдсан бүх цэрэг эрүүл мэндийн шалтгааны улмаас халагдсан. Тэдний хоёр нь эмнэлэгт хэвтэн эмчлүүлэх, хагалгааны заалттай ирсэн. Тэднийг бусдад зодуулж байхыг өөрийн биеэр хараагүй учир тэр тухай нь сайн мэдэхгүй байна. Бусдад зодуулж, эрүү нь хугарсан гэх залуу Улаанбаатар хот руу ирэх замдаа “Буутай бэлтгэл хийж байгаад бууныхаа овоо хараан дээр унаад гэмтчихсэн юм” гэж надад хэлсэн. Харин бусдад зодуулсан эсэх талаар тодорхой зүйл яриагүй.

-Танай ангид дэд ахлагч Б.Тэмүжин гэж салааны орлогч байдаг байсан уу. Түүний бусдыг дээрэлхэж, зодож байхыг нь харж байсан уу?

      -Тэр манай салааны нэг байлдагчийг хоол идэх үеэр элэгдэж байсан. Гэхдээ дараа нь уучлалт гуйгаад, гар бариад салж байхыг нь би харж байсан. Түүнээс өөрөөр бусдыг зодож, дарамталж байхыг нь мэдэхгүй. Надад ч огт гар хүрч байгаа. Түүнийг бусдыг хэвтэрт ортол нь зодсон гэж бодохгүй байна.

ХАЛАГДСАН ЦЭРГИЙН ААВ М: НАДАД МАШ ИХ ДАРАМТ ИРЖ БАЙНА. БИ АЙГААД ГАР УТСАА АВЧ ЧАДАХГҮЙ БАЙНА

       Хилийн цэргийн 0132 дугаар ангиас хагалгаанд орох заалттай ирсэн хоёр байлдагчийн нэгний аав М-тэй холбогдож, хүүгийнх нь биеийн байдлын талаар тодрууллаа. Тэрбээр “Хүүгийнхээ асуудлын талаар би хэсэг хугацааны дараа олон нийтэд нэгдсэн байдлаар мэдээлэл өгнө. Одоогоор над руу олон хүн залгаж байна. Би айгаад гар утсаа авч чадахгүй байгаа. Хүүгийн минь сэтгэл санаа тогтож өгөхгүй хэцүү байна” гэлээ.

    0132 дугаар ангийн дэд ахлагч Б.Тэмүжингийн байлдагч нарыг дарамталж, зоддог байсан асуудлыг ХХЕГ-ынхан нууж, биеийн байдал нь хүнд байгаа байлдагч нарыг ар гэрийнхэндээ ямар ч тайлбар өгч болохгүй гэхчилэн дарамталж байгаа гэх. Мөн эрүүл мэндийн шалтгааны улмаас цэргийн алба хаах боломжгүй байсан залуусыг цэрэгт татаж, давтан үзлэгээр буцаасан гэх нь Батлан хамгаалах яам, Зэвсэгт хүчний жанжин штаб, Цэргийн штабынхны анхаарах, хариуцлагатай байх чухал асуудлын нэг болоод байна.