Эрүүгийн цагдаагийн албаны Хулгайлах гэмт хэрэгтэй тэмцэх хэлтэс, Өвөрхангай аймаг дахь цагдаагийн газрын Хархорин сум дахь сум дундын цагдаагийн хэлтсийн алба хаагчид хамтран бурхан хулгайлсан этгээдүүдийг баривчилжээ. Тодруулбал, Өвөрхангай аймгийн Хархорин сум дахь хийдэд хулгай орж Майдар бурхан гурав, Богд зонхов бурхан шавьтайгаа хоёр, Өндөр гэгээн Занабазар нэг бурхан алдагдсан дуудлага, мэдээлэл цагдаагийн байгууллагад иржээ. Дуудлагын дагуу хойшлуулшгүй ажиллагаа явуулж, бурхан хулгайлсан этгээдүүдийг баривчилсан байна. Урьдчилсан байдлаар Бурхан хулгайлсан Ж, Б нар нь өмнө нь хулгайн хэргээр ял шийтгэл эдэлж байжээ. Мөн тэд П, Б, Т гэх этгээдтэй бүлэглэн хулгай хийсэн нь тогтоогдоод байгаа аж.

       Тус этгээдүүд нь Архангай, Өвөрхангай, Завхан аймаг, нийслэлийн Сонгинохайрхан, Багануур дүүргүүдийн нутаг дэвсгэрт байрлах сүм хийдүүдэд хууль бусаар нэвтрэн зургаан удаагийн үйлдлээр хулгайлах гэмт хэрэг үйлдсэн болохыг нь тогтоон, гэмт хэргийн замаар олж авсан эд зүйлсийг эд мөрийн баримтаар хураан авч шалгалтын ажиллагааг үргэлжлүүлэн явуулж байна. 

Дээрх этгээдүүдэд Монгол Улсын Эрүүгийн хуулийн Тусгай ангийн 17.1 дүгээр зүйлийн 2.1 дэх хэсэгт зааснаар эрүүгийн хэрэг үүсгэж яллагдагчаар татах саналтайгаар Хархорин сум дахь Сум дундын прокурорын газарт хүргүүлсэн байна.

Иймд сүм хийд, аж ахуйн нэгжүүд стандартын шаардлагад нийцсэн камержуулалт суурилуулахад анхаарч харуул хамгаалалт,  хөршийн холбоогоо сайжруулахыг цагдаагийн байгууллагаас анхааруулж байна.