Бүтээн байгуулалтын ажил нь аль 2019 онд эхэлсэн ч өдийг болтол дуусаагүй байгаа ганцхан замын ажил бол Дарханых. Улаанбаатар байтугай Азидаа хамгийн их ачаалалтайд тооцогддог Улаанбаатар- Дархан чиглэлийн замыг дөрвөн эгнээ болгон өргөтгөж, шинэчлэх шийдвэрийг МУ-ын Засгийн газрын 2018 оны есдүгээр сарын 5-ны өдрийн хуралдаанаар гаргасан байдаг. Нийтдээ 204.11 км замыг хоёрхон жилийн дотор барьж, 2020 онд ашиглалтад өгөхөөр төлөвлөсөн боловч уг зам өнөөдрийг хүртэл ашиглалтад оролгүй, зам засаж байгаа компаниуд нь ч, зорчигчид нь ч шороо, тоос, шавар шалбаагтай зууралдсан хэвээр байна. Үүнээс улбаатайгаар Дарханы замд осол аваар гарах нь элбэг. Наанадаж бороо ихтэй байгаагийн улмаас түр замд олон машин шаварт сууж, зарим ачаа тээврийн машинууд кранаар татуулахаас өөр аргагүйд хүрч, түүнийгээ бүтэн 24 цаг хүлээнэ. Үүнээс илүүтэй хамгийн эмгэнэлтэй нь уг замд олон аавын хүү, халамжит хань, бяцхан үрс амиа өргөж буй явдал юм. Иймд Мянгуужингийн үлгэрээр орсон гэдгээрээ алдартай Дарханы замын ажилд чих тавьлаа.

Дарханы замын II, IV багц ажлын гүйцэтгэгч компанийг сонгох тендер шалгаруулалтын ажил үргэлжилж байна

Азийн хөгжлийн банкны 83 сая ам.долларын  санхүүжилтээр Улаанбаатар-Дархан чиглэлийн 204.11 км хатуу хучилттай  авто замыг засварласан бол Дарханы замыг дөрвөн  эгнээ болгох ажлыг Европын сэргээн босголтын хөгжлийн банкны 137 сая ам.долларын санхүүжилтээр барьж буй. Ерөнхийдөө хоёр өөр банкны хоёр өөр төсөл, хөтөлбөрөөр Дарханы зам баригдаж байна гэсэн үг. Нийт таван багц ажлыг хийж гүйцэтгэхээс II, IV багцын ажил таг гацаад байна. Учир нь гүйцэтгэгч болох БНХАУ-ын Шинжааний компани гэрээгээ цуцлах хүсэлтийг өнгөрсөн 2020 оны наймдугаар сард  гаргасан байдаг. Тус компаниуд хөдөлгөөний аюулгүй байдлыг хангах үүднээс дараагийн компанийг сонгон шалгаруулах хүртэл зарим зам засварын ажлыг гүйцэтгэсэн. Харин “Багц-2”, “Багц-4”-ийн зам барилгын ажлын гүйцэтгэгчийг дахин сонгон шалгаруулах ажлыг АХБ-ны Худалдан авах ажиллагааны журмын дагуу тендерийг энэ тавдугаар сард сонгон шалгаруулж, гэрээ байгуулна гэж Зам тээврийн хөгжлийн яамнаас мэдээлсэн байдаг. Гэвч одоог хүртэл тендер шалгаруулалтын ажил дуусаагүй байгаа аж.

Хоёрдугаар багц Хар модот давааны араас Урьхан хүртэлх 45.5 км авто замыг “Чайна стэйт Шинжиан констракшн инженеринг” групп,  Дөрөвдүгээр багцыг Сүмбэрийн уулзвараас Цайдамын хөндий хүртэлх 45.08 км авто замыг “Чайна стэйт Шинжиан констракшн инженеринг” групп хариуцаж байсан билээ.

         Харин нэгдүгээр багц болох баруун аймаг салах тойрог уулзвараас Хар модот давааны ар хүртэлх 37.26 км авто зам, гуравдугаар багц Урьханаас Сүмбэрийн уулзвар хүртэлх 45.74 км авто зам, тавдугаар багц  Цайдамын хөндийгөөс Дарханы тойрог уулзвар хүртэлх 30.53 км авто замын хучилтын ажлыг хийж дууссан бөгөөд ирэх долдугаар сард буюу Үндэсний их баяр наадмын үеээр зорчих хөдөлгөөнийг нээх гэнэ.

      Энэ талаар Зам, тээврийн яамны Авто зам, замын байгууламж, засвар ашиглалтын албаны дарга Д.Загдраднаа “Азийн хөгжлийн банк (АХБ), Еюропын сэргээн бослголтын банкны хөнгөлөлттэй санхүүжилтээр хэрэгжиж буй хоёр ажил байгаа. Үүнээс АХБ-ны хөрөнгө оруулалтын хийгдэж буй таван багц ажлын  I, III, V багц ажил дууссан бөгөөд наадмын үеэр зорчих хөдөлгөөнийг нээх зорилготой байна. Нийтдээ 130 орчим километр зам гэсэн үг. Харин II, IV багц ажлын замыг ирэх 2022 онд ашиглалтад оруулна. Гүйцэтгэгч компанитай байгуулсан гэрээг цуцалсан. Одоогоор тендер шалгаруулалтын ажил явагдаж байна. Евродын сэргээн босголтын банкны хөрөнгө оруулалтаар хийгдэх ажил энэ оны гуравдугаар сард эхэлсэн. Уг ажил ид явагдаж байна. Энэ ондоо багтаан газар шороо, хиймэл байгууламжийн ажлаа дуусгахаар ажиллаж байна. Замын хучилтынн тухайд 40 см суурьтай байх бөгөөд дээр нь 10 см асфальттай байх юм. Би Дарханы замд газар дээр нь ажиллаж байна. Бороо ихтэй байгаа учир түр зам шавар шалбааг ихтэй байна. Бороотой учир замын ажил хийхэд бэрхшээлтэй байна. Автомашины хөдөлгөөн баяр наадам, амралтын үетэй холбоотойгоор багагүй байна. ОХУ-аас орж ирж байгаа ТИР машин их зорчиж байна. Түр замд автомашин шаварт суусан тохиолдолд хариуцсан компаниуд татаж, гаргаж байгаа” гэв.

Улаанбаатар-Дархан чиглэлийн замыг төлөвлөсөн хугацаандаа ашиглалтад орно хэмээн найдсан иргэд түр замыг ашиглаж, бас ч үгүй төр, засгийн шийдвэрийг хүндэтгэн “Сайхан замтай болно” хэмээн итгэл тээсээр буй. Гэвч товлосон хугацаандаа зам харгуйгаа хүлээлгэж өгөх байтугай хугацааг нь дахин дахин сунгадаг “молиго” үмхүүлж яваа салбарын уг ажил мөд дуусахгүй нь.