Н.ЭНХБАЯР: “Эрдэнэт үйлдвэр” ТӨҮГ нь нэг хоногт 88 мянган тонн хүдэр боловсруулж, зургаан тэрбум төгрөгийн борлуулалт хийдэг

2023-09-15, 612

“Эрдэнэт үйлдвэр” ТӨҮГ-ын алба хаагчид өнөөдрөөс эхэлж ажил хаялт зарлаж байгаа талаар бид мэдээлсэн.Тэгвэл “Эрдэнэт” үйлдвэр нэг бүтэн өдөр ажиллахгүй байснаар улсад ямар алдагдал учирч болзошгүй талаар эдийн засагч Н.Энхбаяраас тодрууллаа.

Тэрбээр “Эрдэнэт үйлдвэр” ТӨҮГ нь нэг хоногт 88 мянган тонн хүдэр боловсруулж, зургаан тэрбум төгрөгийн борлуулалт хийдэг. Мөн 2.6 тэрбум төгрөгийн татварыг төлдөг талаар тус үйлдвэрийн веб хуудаст дурджээ. “Эрдэнэт үйлдвэр” ТӨҮГ 2022 онд гэхэд 1.8 их наяд төгрөгийн татвар хураамж төлжээ. Тиймээс түргэн хугацаанд ажилчидтайгаа ойлголцох, тэдэнд цалинг ямар үе шаттай яаж нэмэх талаараа тайлбарлаж өгөх хэрэгтэй. Хэрэв ажил хаялт зогсохгүй бол улсын төсөвт их хэмжээний хохирол үүсэх магадлалтай. “Эрдэнэт үйлдвэр” ТӨҮГ 2022-2023 онд ашигтай ажилласан хэдий ч энэ орлогоо ашиглаад дуусвал ирэх жилүүдэд алдагдалд орох магадлалтай” гэлээ.