УИХ, Засгийн газраас инфляцийг бууруулахаар амлаж, хэрэгжүүлж байгаа ажил нь зөвхөн цаасан дээр л хэрэгжээд, амьдрал дээр бууж байгаа юм алга. Иргэдийн амьдрал цар тахал, хөл хорионы үеэсээ ч хүнд болж, цалин нь ч кг хүрэхгүй мах, хэдэн ширхэг хүнсний ногоо гэсээр дуусаж байх. Төрийн томчуудын “Инфляц буурч байна” гэсэн улс төрийн шоу цаас, цахим сүлжээ хоёрт л хэрэгжхээс бус, үнийн дарамтад “дарлуулж”, “зутарч” байгаа иргэддээ хүрч байгаа нь үгүй.

-ӨНГӨРСӨН ОНТОЙ ХАРЬЦУУЛБАЛ ОЛОНХ БАРАА, БҮТЭЭГДЭХҮҮНИЙ ҮНЭ НЭМЭГДЖЭЭ-

Манай орны инфляц өнгөрсөн дөрөвдүгээр сарын дүнгээр 11.3 хувьтай гарсан. Харин өнгөрсөн оны мөн үед 15.8 хувьтай гарч байсантай харьцуулахад амьжиргааны түвшин 4.5 нэгж хувиар буурчээ. Инфляц буурахад дотоодод төгрөгийн ханштай чангарсантай холбоотой. Сүүлийн хэдэн сард төгрөгийн ам.доллартой харьцах ханш 1.28 хувиар чангарсан сайн мэдээтэй. Гэсэн ч амьдрал дээр үнийн өсөлт, дарамт үргэлжилж, цаасан дээр байгаагаас өөр үр дүн үзүүлж байгааг статистик мэдээллээр үзүүлье.

Инфляц 11.3 хувьтай гарсан дөрөвдүгээр сарын үзүүлэлтийг өнгөрсөн оны мөн үеийнхтэй харьцуулбал:

• Хүнсний бараа, ундаа, ус зэрэг бүтээгдэхүүн 17 хүртэлх хувиар,
• Согтууруулах ундаа, тамхи 8.1 хүртэлх хувиар,
• Хувцас, бөс барааны үнэ 13.2 хүртэлх хувиар,
• Орон сууц, ус, цахилгааны төлбөр, хий болон түлшний үнэ 6.7 хүртэлх хувиар,
• Гэр ахуйн бараа, тавилгын үнэ 13 хүртэлх хувиар,
• Эм, тариа, эмнэлгийн хэрэгсэл 6.7 хүртэлх хувиар,
• Зочид буудал, нийтийн хоол, дотуур байрны үйлчилгээ 24 хүртэлх хувиар өссөн үзүүлэлттэй байна.

​

Монгол Улсын инфляцийн түвшин /2023 оны дөрөвдүгээр сарын байдлаар/

Үндэсний статистикийн хорооны тайлангаар 2023 оны дөрөвдүгээр сарын үзүүлэлтийг өнгөрсөн оны мөн үетэй харьцуулахад инфляцийн сагсыг бүрдүүлж буй 400 гаруй нэр төрлийн барааны олонхынх нь үнэ нэмэгдсэн бөгөөд үүнээс сүүлд дурдсан зочид буудал, нийтийн хоол, дотуурны байрны үнэ 24 хүртэлх хувиар нэмэгдсэн нь хамгийн өндөр дүн болжээ.

Гол нэрийн бараа бүтээгдэхүүний үнийн өсөлтийн үзүүлэлт /Улаанбаатар хотод/

Гол нэрийн бараа бүтээгдэхүүний үнийн өсөлтийн үзүүлэлт /Аймгийн төвүүдэд/

-ИНФЛЯЦ БУУРАХЫГ ХҮЛЭЭСЭЭР АРД ТҮМЭН "МОДОО БАРИХ" НЬ-

Өнгөрсөн онд 17 хувь болтлоо өсөөд байсан инфляцийг бууруулахын тулд Төв банкнаас 2023 онд улсын инфляцийг нэг оронтой тоонд барих зорилт дэвшүүлсэн. Үүний адилаар Эдийн засаг, хөгжлийн сайд Ч.Хүрэлбаатар “Монгол Улсын инфляц ирэх зун гэхэд нэг оронтой тоонд орно” хэмээн мэдэгдээд байгаа. Хэдий өнгөрсөн жилээс хойш инфляцийн хурд саарсан ч хоёр оронтой тооноос бууж чадахгүй байгаа нь хүндрэл дагуулж байна.

                   Инфляцийг нэг оронтой тоонд барих зорилтын талаар Монголбанкнаас “Инфляц аажим аажмаар буурч байгаа. Цаашид илүү буух халдлагатай байна. Мөнгөний бодлогын үр дүн гарч, төгрөгийн хадгаламжийн өгөөж нэмэгдэж, иргэд хадгаламжаа төгрөгөөр хадгалуулах сонголт хийж байгаа нь төгрөгийн ханш чангарах цаашлаад инфляц буурахад нөлөөлж байгаа” гэсэн юм.

Нэг хүнд ногдох ДНБ-ий хэмжээ/ам.доллароор/

                   Манай орны инфляц гуравдугаар сард 12.2 хувь гарч, дөрөвдүгээр сарынх нь 0.9 хувиар буурсан үзүүлэлттэй гарсан. Гэсэн ч амьжиргааны түвшин буурч байгаа нь иргэдэд нөлөөлөхгүй, амьдрал дээр бууж өгөхгүйг байгааг олон нийт хэлж байна. Сарын цалин нь хаанаа ч хүрэхээ больчихоод, хоногийн хоолоо “Хэрхэх вэ” гэсэн иргэд дэлгүүрээс кг хүрэхгүй мах, хэдхэн ширхэг ногоо авсаар л өрний дэвтрийг нь дүүргэчихдэг. “Цалингаа буухаар нь өгнө дөө” гэдэг ч гар дээр нь ирж байгаа мөнгө одоогийн амьжиргааны түвшин өндөр, үнийн дарамттай байгаа үед хаанаа ч хүрэхгүй дуусаад ард түмэн “зутарч”, туйлдаж байна даа.