Ам.долларын ханшийн уналт өнгөрсөн хоёр сар гаруйн хугацаанд үргэлжилсэн. Төгрөгтэй харьцах үнэ нь 3500 гаруй болж байсан ам.доллар ердөө сүүлийн нэг сарын хугацаанд “навс” унасан байгаа юм. Үүний гол хүчин зүйл болсон төгрөгийн ханш чангарч байгаа нь цаашид амьжиргааны түвшин ч буурах хүлээлт үүсгээд байна. Монголын эдийн засгийг төгрөгийн ханш чангарч, инфляц буурсан хэдхэн сар хүлээж байна, гэхдээ.

-ТӨГРӨГИЙН ХАНШ ЧАНГАРЧ, АМ.ДОЛЛАР УНАХ БОЛСОН ШАЛТГААН ЮУ ВЭ-

                     Өнгөрсөн гуравдугаар сарын 18-ны байдлаар голлох валют ам.долларын ханш Монголбанканд 3528.08 төгрөг байсан. Харин өчигдрийн буюу дөрөвдүгээр сарын 27-ны Монголбанкны хаалтын ханшаар 3476 төгрөг болжээ. Уг нь иргэдийн дунд “Ам.доллар 3500 төгрөгөөс буухгүй. Харин ч он дуустал аажмаар өснө. Магад 3650 төгрөг хүрнэ” гэх яриа гарч, олон хүн ам.доллар авч, “дарсан”. Гэтэл сүүлийн нэг сард “навс” уначихаад байгаа ханшийг нь сонссон хүмүүс ам.доллароо эргүүлэн зарж байгаа гэнэ.

Харин төгрөгийн ханш чангарах болсон асуудалд иргэд олон таамаг дэвшүүлж байгаагийн нэг нь “Эрх баригч нам хоёр онгоц төгрөг хэвлүүлж ирсэн байж болзошгүй” гэх яриа. Зах зээл эргэлдэх мөнгөний нөөцөө бүрдүүлэхийн тулд гадаадад нууцын зэрэглэлтэй мөнгө хэвлүүлдэг манай орон сонгууль дөхсөн гээд гэнэт хоёр онгоц төгрөг хэвлүүлж, хөдөлмөрийн эрхлэх сан, малчдад зориулж магад гэсэн яриа хэдий нь хүмүүсийн чихэнд хүрээд, хүн бүр л ярьж явах. Харин өөр нэгэн шалтгаан нь Монголбанк нэмэлтээр алт худалдан авсан нь төгрөгийн ханшийг чангаруулсан гэнэ. Тухайлбал, олон улсад алтны үнэ огцом өссөн нь манай Төв банкны алт төдийгүй төгрөгийн ханшийг “суга” өсгөж байгаа юм байна.

-АМ.ДОЛЛАРЫН ХАНШ ЭРГЭН ӨСНӨ-

Ам.долларын ханшийн уналт ирэх хэдэн сарын турш үргэлжлэх талаар ярьж буй. Гэсэн ч голлох валют ам.доллар үүнээс илүү унаж, төгрөгтэй харьцах ханш нь 3400, 3300 төгрөгт хүрэх нь эргэлзээтэй. Манай оронтой харьцуулахад олон улсад ам.долларын уналт дөрвөн сар үргэлжлээд байгаа. Гэсэн ч энэ долоо хоногийн эхээр арилжааны дүнд ам.доллар бусад томоохон валюттай харьцах үнэ нь эргэн сэргэж, өссөн юм. Холбооны нөөцийн сан бодлогын хүүгээ илүү урт хугацаанд өсгөх магадлалтай гэх ярианаас үүдэн ам.долларын ханш өсөж байгаа аж.

Монголд ам.долларын ханшийн уналт III улирал хүртэл үргэлжлэх гэнэ. Үүнийгээ даган тухайн цаг хүртэл амьжиргааны түвшин ч тодорхой хэмжээнд буурах бөгөөд III улирлаас эргэн ам.доллар “тэнгэрт”-тээ хадаж, төгрөг “цаас” болоод л үлдэх бололтой.