НЭР ДЭЭРЭЭ НЭГ Ч БИЗНЕСГҮЙ АТЛАА ТЭРБУМ ТӨГРӨГИЙН ҮНЭТ ЭДЛЭЛЭЭР ГАНГАРДАГ ГАНЦ ТҮШЭЭ

2026-05-21, 33

Анх Ч.Ундрам Ж.Оджаргалын “MCS” ХК-д Маркетингийн менежер байлаа. Харин аав Ч.Чинбат нь ээмэг, бөгж сэлтхэн урладаг “Молор-Эрдэнэ” ХХК-ийн захирал байв. Дараа нь Ч.Чинбат Сэлэнгэ аймгийн Мандал сумын нутагт орших Ноён уулын аманд алт ухаж, улмаар алт, нүүрс, зэс, төмрийн хүдрийн асар олон орд эзэмшдэг “Монзол групп” ХХК-ийн эзэн болж “томорсон”. Харин Ч.Ундрам МУИС-ийн Санхүү хариуцсан дэд захирал болж, 2017 оноос У.Хүрэлсүхийг бараадаж явсаар 2020 онд Сэлэнгэ аймгаасаа УИХ-ын гишүүн болж, 2024 онд улираад буй. Сонирхуулахад, тэртээ 20 гаруй жилийн өмнө Сэлэнгэ аймгийн Мандал сумын нутагт орших Ноён уулын алтыг Л.Чинбат, Ч.Чинбат хоёр нэгэн зэрэг ухаж хөлжсөн. Өдгөө Л.Чинбатын охин Ч.Номин, Ч.Чинбатын охин Ч.Ундрам хоёр Төрийн ордонд тохой нийлүүлж суугаа нь тун сонин давхцал.

УИХ-ын гишүүн Ч.Ундрам өдгөө өөрийнхөө нэр дээр нэг ч компанигүй, бизнес эрхэлдэггүй боловч 750 сая төгрөгийн гурван жийп ээлжилж хөлөглөдөг, 1.0 тэрбум төгрөгийн үнэт эдлэлээр гангардаг, хагас тэрбум төгрөгийн хадгаламжтай. Тэрбумтны өв залгамжлагч учраас хувьдаа компанитай байх ч шаардлага байдаггүй биз. Дээрээс нь тэр сонгуулийн санхүүжилтдээ ч санаа зовдоггүй бөгөөд өнгөрсөн хоёр сонгуулиар аав Ч.Чинбат нь 10 гаруй охин компаниараа бүх санхүүжилтийг нь гаргасан байдаг. Иймд, УИХ-ын гишүүн Ч.Ундрамын аав Ч.Чинбатынх нь эзэмшдэг компаниуд чухам ямар ордуудыг эзэмшдэг, ямар үйл ажиллагаа явуулдгийг нэг бүрчлэн танилцуулж байна.

УИХ-ЫН ГИШҮҮН Ч.УНДРАМЫН ААВ Ч.ЧИНБАТЫН КОМПАНИ БҮР ОРДТОЙ

Ч.Чинбатын “Өсөх зоос” ХХК нь Өмнөговь аймгийн Гурвантэс сумын нутагт орших стратегийн Нарийн сухайтын бүлэг ордын нэг хэсэг болох Хүрэн шандын нүүрсний ордыг эзэмшдэг, олборлолт явуулдаг.

“Вояжер минерал ресурсес” ХХК нь Баянхонгор аймгийн Бөмбөгөр сумын нутагт орших Далтын өвөр хэмээх 791.61 га талбай бүхий алт, зэс, хүдрийн ордыг эзэмшдэг, олборлолт явуулдаг. Тус ордоо түшиглэн 2018 онд “Хөх булгийн уурхайн хүдэр баяжуулах эко үйлдвэр” барих төслөөр Хөгжлийн банкнаас 476 сая иен буюу 10.5 тэрбум төгрөгийн зээл авсан. Гэвч зээлээ төлөөгүй тул Хөгжлийн банкнаас найдваргүй зээлдэгчдийн жагсаалтад оруулж, нэрийг нь нийтэд зарласан байдаг. Улмаар УИХ-ын гишүүн Ч.Ундрам “Аавын минь компанийг найдваргүй зээлдэгч гэж нийтэд зарлаж, нийгмээрээ шүүмжилснээс болоод аав минь нойргүй хонолоо” хэмээн тунирхаж байв.

“Монзол” ХХК нь Дорноговь аймгийн Даланжаргалан сумын нутагт орших Бор толгой, Дорноговь аймгийн Сайхандулаан сумын нутагт Өлгий цагаан гэх хоёр ордын ашиглалтын тусгай зөвшөөрлийг эзэмшдэг. Мөн Дорноговь аймгийн Сайхандулаан суманд Цагаан толгой гэх ордын хайгуулын тусгай зөвшөөрөлтэй.

“Эрвэн хүдэр” ХХК нь Сүхбаатар аймгийн Сүхбаатар суманд орших Эрвэй хошууны төмрийн хүдрийн ордыг эзэмшдэг, олборлолт явуулдаг.

“MДMУ” ХХК нь Дорноговь аймгийн Айраг сумын нутагт 60 га талбайд “Монгол ширэм” гэх хар төмөрлөгийн үйлдвэрийн төсөл хэрэгжүүлж буй. Төслийнхөө хүрээнд 10 мянган тонн хүчин чадалтай гангийн үйлдвэр, 200 мянган тоннын хүчин чадалтай ширэмний үйдвэр барьж байгаа. Ноцтой нь, тухайн үйлдвэрүүдийнхээ барилга угсралтад хятад ажилчдыг хууль бусаар ажиллуулж байсан нь илэрч, багагүй дуулиан тарьж байв.

“Чингисийн алтан зоос” ХХК нь Дундговь аймгийн Гурвансайхан суманд орших Одод, Увс аймгийн Өмнөговь сумын нутагт орших Сайрт гэх хоёр ордын хайгуулын тусгай зөвшөөрлийг эзэмшдэг.

“Юүри Эм” ХХК нь Төв аймгийн Баян-Өнжүүл, Баянцагаан сумын нутгийн заагт орших Үнэгтийн ордын хайгуулын тусгай зөвшөөрлийг эзэмшдэг.

“Баялаг энержи ресурс” ХХК нь Өмнөговь аймгийн Гурвантэс сумын нутагт нүүрсний Хүрэн шандын нүүрсний уурхайд хөрс хуулалт, олборлолтын үйл ажиллагаа явуулдаг. Нийт 500 гаруй ажилчинтай.

“Лучеро” ХХК нь Сэлэнгэ аймгийн Мандал сумын нутагт орших Ноён уулын амны алтны ордыг эзэмшдэг.

“Ундрах говь” ХХК нь Өмнөговь аймгийн Ханхонгор сумын Тавантолгой-Баруун наран чиглэлийн 32 км автозамын төгсгөлөөс Цагаан дэл уул хилийн боомт хүртэлх 270 км хүнд даацын автозамын төсөлд шалгарсан. Уг төслийг нийт 230 сая ам.доллароор хэрэгжүүлж, зам ашиглалтад ормогц Цагаан дэл уул хилийн боомтыг нээж, урд хөрш рүү зөөх нүүрс тээврийг эрчимжүүлэхээр төлөвлөж байгаа.

“Нарийнсухайтын төмөр зам” ХХК нь 2024 онд Шивээхүрэн-Сэхээ боомтын 6.9 км хил холболтын төмөр замын төслийг хэрэгжүүлсэн. Энэ төмөр замын ерөнхий гүйцэтгэгчээр “Баялаг энержи ресурс” ХХК нь ажилласан.

“Шивээхүрэн терминал” ХХК нь Шивээхүрэн боомт дээр 17 га талбайд Чингэлэг тээврийн терминал барьсан.

“Саруулшилтгээн констракшн” ХХК нь Хан-Уул дүүргийн 19-р хороо, Улаанбаатар сувиллын урд 16 давхар, гурван блок, нийт 444 айлын “Саруул шилтгээн” хотхоныг барьж, ашиглалтад оруулаад буй.

Харин Ч.Ундрамын төрсөн дүү Ч.Золбаяр нь Цэрэндоржийн Мөнхбаатартай “Нүүдэлчин эко ресурс” ХХК-ийг хамтран эзэмшдэг. Харин Цэрэндоржийн Мөнхбаатар нь “Эко ресурс” ХХК-ийг эзэмшдэг. “Эко ресурс” ХХК нь өнгөрөгч 2024 онд нийслэлд “Нүүдэлчин” нэртэй 32 мянган утаагүй зуухыг 28 тэрбум төгрөгөөр шахах оролдлого хийсэн нь илчлэгдээд "царцсан", С.Одонтуяагийн “зүтгүүлж” асан төсөл юм.

НЭР ДЭЭРЭЭ НЭГ Ч БИЗНЕСГҮЙ АТЛАА ТЭРБУМ ТӨГРӨГИЙН ҮНЭТ ЭДЛЭЛЭЭР ГАНГАРДАГ ГАНЦ ТҮШЭЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.