Төрд дархлагдсан Д.Тогтохсүрэн, С.Чинзориг нарын хууччууллыг  халж, Төвийн бүсээс Их хуралд хоёр удаа сонгогдсон хүн бол Жигжидийн Батжаргал.  Төв аймгийн Баян-Өнжүүл сумын уугуул тэрбээр нутгийн ах, УИХ-ын дарга асан М.Энхболдыг хормойдож, улс төрд хөл тавьж байсан түүхтэй. Ингэхдээ сумынхаа ИТХ-ын даргаар дөрвөн жил, Төв аймгийн ИТХ-ын даргаар 10 жил ажиллаад, 2016 онд аймгийнхаа Засаг дарга болж, дөрвөн жил засагласан.

             2019 онд УИХ-ын дарга асан М.Энхболд улс төрийн тайзнаас унахдаа Ж.Батжаргалыг Н.Энхболдтой хөтлөлцүүлэн 2020 оны сонгуулиар Төрийн ордонд оруулснаар гавьяа байгуулж магтуулаагүй ч, гай тарьж загнуулахгүйгээр дөрвөн жилийг барсан гэж болно. Улмаар М.Энхболдын бүлэглэлийнхнийг өнгөрсөн сонгуулиар улс төрийн хүрээллээс гаргаж, тойргийн гадна үлдэхэд дотор тунаж үлдсэн ганц нь  Ж.Батжаргал юм.

              УИХ-ын гишүүн Ж.Батжаргал хэтэвчнийхээ зузаанаар ордны “заал”-ндаа сүүл мушгидаг. Жишээ нь, 2023 онд 110 саяын нэг орон сууцтай, машингүй, хадгаламжгүй, хувьдаа компанигүй, дансандаа 825 мянган төгрөгтэй хэмээн мэдүүлж, хамгийн “ядуу” гишүүнээр “өргөмжлөгдөж” байв. Гэхдээ яг үнэндээ “ядуу” харагдах нь М.Энхболд, Н.Энхболд хоёроос өвлөсөн заль гэж болно. Цаашилбал, Ж.Батжаргалыг 2016 онд Төв аймгийн Засаг дарга, 2020 онд Төрийн түшээ болсноос нь хойш ураг төрлийнхөн нь төрийн алба руу хошуурцгааж эхэлсэн. Түрийвч нь нимгэн байж болох ч төрийн албан дахь төрлүүдээрээ тэр баян гэсэн үг.  

        Тухайлбал, Ж.Батжаргалын эхнэр Ц.Ариунаа нь Төв аймгийн төрийн өмчит “Хүмүүн” цогцолбор цэцэрлэгийн эрхлэгчээр 2009 оноос өнөөдрийг хүртэл ажиллаж байна. Ц.Ариунааг цэцэрлэгийн эрхлэгч болоход нь УИХ-ын гишүүн Ж.Батжаргал Төв аймгийн ИТХ-ын дарга байлаа.

      Харин охин Б.Нямсүрэн нь Төв аймгийн Төрийн аудитын газрын аудитораар ажилладаг бол  хадам дүү Ц.Эрдэнэбаатар нь Соёлын яамны харьяа Богд хааны ордон музейн захирлаар 2018 онд томилогдон өнөөг хүртэл ажиллаж байна.   Түүнчлэн Ж.Батжаргалын төрсөн эгчийнх нь хүү Б.Насанжаргал Төв аймгийн Газрын харилцаа, барилга, хот байгуулалтын газрын дарга, Б.Насанжаргалын эхнэр Г.Ариун-Уянга нь Төв аймгийн ЗДТГ-ын Нягтлан бодогч, төрсөн эгчийнх нь хүү Б.Сансар Төв аймгийн Мал эмнэлгийн газрын хэлтсийн даргаар ажиллаж байна. Угтаа бол Төв аймгийн Зуунмод хот, Хөгшигтийн хөндийг дагуул хот болгох Засгийн газрын чухал төлөвлөгөө хэрэгжиж байгаа энэ цаг үед Ж.Батжаргалын хамаатнууд Төв аймгийн төрийн албанд том алба хашиж, төрөөс гаргасан шийдвэрийг хурууныхаа үзүүрээр шийдэх хариуцлагатай үүргийг хүлээж сууна.  Мөн Ж.Батжаргалын 2020 оны сонгуулийн менежер Ч.Сарангэрэл түүнийг гишүүн болмогц Зуунмод хотын захирагч, Зуунмод сумын Засаг дарга болж тушаал дэвшээд, дөрвөн жил ажилласан. Өдгөө Зуунмод сумын ИТХ-ын төлөөлөгчөөр сууж, М.Энхболд, Ж.Батжаргал нарын улс төрийн замналыг үргэлжүүлж байна.

        Эндээс харахад Ж.Батжаргал төрд насаараа ажиллахдаа төрлийнхнөө, туслах, зөвлөхөө төрийн албанд татаж, хэтэвчээ зузаалахаас ч илүү “хөрөнгө” босгосон гэж болохоор байна. Цаашлаад Төв аймгийг дагуул хот болгоно гэх төлөвлөгөө хэрэгжиж байгаа энэ цаг үед Ж.Батжаргалын эрх ямба тэр чинээгээрээ өндөр байна.

          Түүнчлэн Ж.Батжаргал сумын Засаг даргаас Их хурлын гишүүн болтол шат ахихдаа нэр цэвэр албан тушаалд хүрсэн гэдэг ч ашигт малтмалын тусгай зөвшөөрөлтэй холбоотой асуудалд нэр холбогдож байлаа.

             Тодруулбал, Төв аймгийн Заамар суманд “Эрдэнэсийн эрэг” ХХК “Өвөр наймганы ам” хэмээх газар 3921.28 га талбайд ашигт малтмалын хайгуулын эзэмшиж байна. Энэхүү тусгай зөвшөөрлийг 2017 онд Ашигт малтмал, газрын тосны газраас 15441.08 га газар өгсөн ч нутгийн иргэд эсэргүүцэж, сүүлд 3921.28 га талбай болгосон аж. Ноцтой нь, УИХ-ын гишүүн Ж.Батжаргал 2017 онд Төв аймгийн Засаг даргаар ажиллаж байхдаа Төв аймгийн Засаг дарга асан Д.Мөнхбаатар, Зуунмод сумын Засаг дарга асан Ч.Сарангэрэл, тухайн үеийн ИТХ-ын дарга асан Ц.Энхбат, Төв аймгийн Засаг даргын орлогч асан Г.Сурмаа нартай хамтран “Төв Эрдэнэс” ОНӨААТҮГ-г байгуулсан. Тус компани нь Төв аймгийн Заамар суманд байх хоёр тонн алтны нөөцийн хайгуулын тусгай зөвшөөрлийг эзэмшиж буй  “Эрдэнэсийн эрэг” компанийн 34 хувийг эзэмшдэг аж. Харин “Эрдэнэсийн эрэг” компанийн 64 хувийг “Голд Харбор” компани эзэмшиж байна. Улмаар Ж.Батжаргал тэргүүтэй Төв аймгийн удирдлагуудыг хоёр тонн алтны нөөцтэй ордыг  ОНӨААТҮГ-ын эзэмшилд шилжүүлэх нэрээр бусдад давуу байдал олгосон хэмээн иргэд эсэргүүцлээ илэрхийлж байсан. Гэвч уг асуудал өнөөдрийг хүртэл шийдэгдээгүй байна. Хэдийгээр “Эрдэнэсийн эрэг” компани ашигт малтмалын олборлолт хийж, үйл ажиллагаа явуулж эхлээгүй ч хайгуулын тусгай зөвшөөрөл нь хүчинтэй хэвээр байна.

           Сонирхуулахад “Эрдэнэсийн эрэг” ХХК нь Ж.Эрдэнэбатын хамаарал бүхий “Илт гоулд” компанийн удирдлагуудтай холбогддог. “Илт гоулд компани” нь Төв аймгийн Заамар суманд ашигт малтмалын тусгай зөвшөөрөл эзэмшдэг. Мөн л 2017 онд Ж.Батжаргалыг Төв аймгийн Засаг даргаар ажиллаж байх үед ашигт малтмалын тусгай зөвшөөрөл авсан байдаг. Ийн Ж.Батжаргалын Засаг дарга байхдаа Заамарт олгосон алтын тусгай зөвшөөрлийн ард Ж.Эрдэнэбат тэргүүтэй М.Энхболдын бүлэглэлийнхэн эзэн суусан гэх хардлага олны дунд бий.

Өөрөөр хэлбэл, УИХ-ын гишүүн Ж.Батжаргал М.Энхболдын бүлэглэлийг дахин улс төрд бэлтгэж, төрийн албанд төрлүүдээ төвхнүүлж, алтны ордоо ашиглах бэлтгэлээ хангаж буй бололтой.