Хойд туйлын цагаан баавгайн тухай хүн болгоны тэр бүр мэддэггүй 11 баримтыг хүргэж байна.

1. Цагаан баавгай далайн хөхтөн амьтны зүйлд ордог

Учир нь цагаан баавгай нь амьдралынхаа ихэнх цагийг Умард мөсөн далайд өнгөрөөдөг болохоор далайн хөхтөн амьтандаа ордог баавгайн ганц төрөл юм.

2. Цагаан баавгай яг үнэндээ цагаан биш хар өнгөтэй

Цагаан баавгайн үс нарны гэрлээс үүдэн гэрэлтэж харагддаг ба үс нь цагаан хэдий ч арьс нь хар өнгөтэй.

3. Тэд өдрийнхөө ихэнх цагийг сэлж өнгөрөөдөг

Цагаан баавгай урт хугацааны турш мөсөн далайд байх чадвартай хийгээд цагт есөн км газрыг туулж чаддаг байна. Том сарвуугаараа сэлүүрдэн, хөлөөрөө жолооддог.

4. Тэдний хоёроос доош хувь нь ангаа амжилттай агнадаг

Цагаан баавгай амьдралынхаа тэн хагасыг хоолоо олоход зарцуулаг ба ихэнхдээ бүтэлгүйтдэг байна. Тэд ихэвчлэн цагирган далайн хав, сахалт цагаан хав, амьтны сэг, шувуу, өндөг зэргээр хооллодог.

5. Эрдэмтэд цагаан баавгайн хөлний хээгээр нь ДНХ-г нь тогтоож чадна

Шинэ дэвшилтэт технологид суурилан Дэлхийн байгаль хамгаалах сан, ДНХ-гийн мэргэжилтнүүд цасан дээр мөрөө үлдээсэн цагаан баавгайнуудын мөрөөр ДНХ-г тогтоож чадна. Цагаан баавгайн явсан мөрний цаснаас хоёр халбага авахад ДНХ тогтооход хангалттай байдаг байна. Гэхдээ илэрсэн ДНХ нь цагаан баавгайнх биш идсэн амьтных нь ч байх боломжтой аж.

6. Дэлхийн дулаарлаас ч эрсдэлтэй тулгамдсан аюул тэдэнд бий

Дэлхийн дулаарлаас болж цагаан баавгайнууд устах аюулд хүрээд байгаа ч түүнээс илүү аюул нь газрын тос болон газын үйлдвэрлэлүүд. Дэлхийн газрын тос, газын үйлдвэрүүд Умард туйлд төвлөрөөд байгаа нь илүү аюул учруулаад байгаа аж. Хэрэв газрын тос хальж урсвал, цагаан баавгайн үс хордож биеэ хамгаалах аргагүй болох аюул нүүрлэх магадлалтай ажээ.

7. Гриззли болон цагаан баавгайн эрлийз баавгай бий

2006 оны генетикийн судалгаагаар цагаан болон гриззли баавгайн эрлийз болох "Гролар" эсвэл "Пиззли" гэгдэх баавгайн шинэ төрлийг илрүүлжээ. Гэхдээ энэ тийм ч гайхах зүйл биш аж. 150 мянган жилийн өмнө цагаан баавгай нь хүрэн баавгайн нэр төрөл байсан билээ. Хүрэн баавгайн нэг хэсэг Умард нутагт суурьшсан агаад байгалийн шалгарлаар ангаа барих зорилгоор үс нь цагаан болж хувирсан юм.

8. 19 бүс нутагт цагаан баавгайн тоо толгой өсөж байна

Нийт 19 бүс нутагт 26 мянган цагаан баавгай амьдарч байгаа ч бүгдийнх нь нутагшлыг тогтоох боломжгүй байна.

9. Эр баавгай нь арван эрэгтэй хүний жинтэй тэнцэнэ

Эр цагаан баавгайн жин 800 кг-аас дээш жинтэй байдаг бол эмэгтэй нь хоёр дахин бага жинтэй байдаг. Цагаан баавгай нь гурван метр өндөр бөгөөд дэлхийн хамгийн том махан идэштэн гэж тэмдэглэгддэг.

10. Тэд хоолоо километрийн цаанаас үнэрлэж чаддаг

Цагаан баавгай нь маш сайн үнэрлэх мэдрэхүйтэй ба далайн хавны амьсгалыг мөсний цоорхойгоор үнэрлэж чаддаг байна. Мөсөнд үүссэн нүх олбол далайн хав ирэхийг хүлээн дайрахад бэлддэг гэнэ.

11. 2050 онд цагаан баавгайн тоо 30 хувиар буурна

Цагаан баавгай нь дэлхийн дулаарал, хүний буруутай үйлдлээс үүдэн ховордож буй амьтдын нэг төрөл зүйл юм. Тэд далайн мөс, бүрхэгдсэн зузаан цасанд л найдан хоолоо хайдаг. Жилээс жилд дэлхийн дулаарлаас цас нь хайлж, амьдрах газаргүй болж буй тэдэнд аврагдах найдвар багассаар байгаа юм. Дэлхийн байгаль хамгаалах сан цагаан баавгайг аврахын тулд чадах бүхнээ хийж байгаа ба цагаан баавгайг үрчилж авах төсөл хэрэгжүүлж эхэлсэн байна. Тоглоом худалдаж авах, мөнгө хандивласнаар цагаан баавгайг аврахад туслах бүрэн боломжтой гэжээ.