НҮБ Нагорный Карабахын асуудлаар мэдэгдэл хийлээ 
НҮБ-ын Аюулгүйн зөвлөл Нагорный Карабахт болж буй зэвсэгт мөргөлдөөний талаар байр сууриа илэрхийллээ. Аюулгүйн зөвлөлийн тэргүүн Абду Абарри зөрчилтэй бүсэд хүнд техник ашиглан цэргийн ажиллагаа явуулж байгааг зөвлөлийн гишүүн орнууд буруушааж, энгийн иргэдийн амь нас эрсдэж буйд харамсаж байна  гэж онцолжээ. Мөн Армени, Азербейжанд галаа зогсоож хэлэлцээр эхлүүлэхийг уриалсан байна. 
 

“Нефтийн эрин дуусаж байна”

Францын газрын тос, байгалийн хийн “Total” компанийн судлаачдын таамаглаж буйгаар нефтийн эрин 2030 он гэхэд дуусаж, хэрэглээ нь эрс буурч магадгүй гэнэ. Дэлхийн олон орон аажмаар байгальд ээлтэй эрчим хүчний үүсгүүрийг сонгож байгаа бөгөөд үүнээс үзвэл цаашид байгалийн хий, нар салхины эрчим хүчний хэрэглээ эрс өсөх магадлалтай гэнэ. Уур амьсгалын өөрчлөлт, дэлхийн дулаарлын улмаас нүүрс, газрын тосны хэрэглээг бууруулах, байгальд орчинд ээлтэй эрчим хүчний үүсгүүрийг сонгох нь зайлшгүйг мэргэжилтнүүд онцолж байгаа билээ. 
 

Дэлхийн банк: Ядуурал нэмэгдэж болзошгүй

Дэлхийн банкнаас гаргасан судалгаанаас харвал 2020 оны сүүлчээр Азийн орнуудад ядуу хүний тоо эрс нэмэгдэж магадгүй байна. Тухайлбал Зүүн Азийн хөгжиж буй орнуудын 38 сая иргэний орлого өдрийн 5.5 ам.доллароос доош орж, буурах эрсдэл буйг судлаачид онцолжээ. Цар тахлаас үүдсэн эдийн засгийн хүндрэл цаашид ч үргэлжлэх төлөвтэй агаад дэлхийн хүн амын 8.8 хувь нь нэн ядуу буюу хүнс тэжээл, хувцас, гэр орон зэрэг ердийн хэрэгцээний гачигдалтай нөхцөлд, өдөрт 1.9 ам.доллароос бага орлоготой  амьдрах эрсдэл нүүрлэж байгааг Дэлхийн банк анхааруулсан байна.