“Улаанбаатар-Бүсчилсэн хөгжил” форум өнөөдөр боллоо.

            Энэ үеэр Нийслэлийн Засаг дарга бөгөөд Улаанбаатар хотын захирагч Х.Нямбаатар “Бид БНХАУ-ын аж ахуй нэгжтэй эрчим хүчний төсөл дээр, хоёрт нь Бөөрөлжүүтийн цахилгаан станцын төсөл дээр хамтран санамж бичиг зурна. Эдгээр санамж бичгээ дөрөв, тавдугаар сардаа нарийвчилсан гэрээ болох төлөвлөгөөтэй байна. Энэ хоёр төслийг амжилттай болговол бид ирэх өвөлдөө эрчим хүчний дутагдлаас гарч чадна. Мөн “Эмээлт” захын аж үйлдвэрийн парк, арьс ширний чиглэлээр үйл ажиллагаа явуулдаг, нэр бүхий компанитай санамж бичиг зурлаа. Энэ нь Улаанбаатар хот өөрийнхөө төвийн суурьшлын бүсээс арьс шир боловсруулах үйлдвэрүүдийг тусад нь “Эмээлт” захын аж үйлдвэрийн паркад гаргах, үүнтэй холбоотой олон улсын санхүүгийн донор байгууллагуудтай хамтран ажиллах. Мөн Нийслэл газар болон дэд бүтэц, бусад хөрөнгө оруулалтад хамтран ажиллах, аж ахуй нэгж байгууллага өөрийн аж ахуй нэгжүүдээ “Эмээлт” захын аж үйлдвэрийн паркийн төлөвлөгдсөн дэд бүтцэд холбогдсон байршлуудад нүүлгэн шилжүүлэх, цаашид бусад зориулалтаар ашиглах процесс ойрын жилд хийгдэхээр төлөвлөсөн байгаа.  Цаашид Улаанбаатар хотын төвийн суурьшлын бүсэд дахиж аж үйлдвэрийн паркууд үйл ажиллагаа явуулахгүй. Харин хотын дагуул хотуудад үйл ажиллагаа явуулах юм. Түүнээс гадна    хатуу хог хаягдлыг шинэ түвшинд гаргах холбогдох аж ахуй нэгжтэй бид гарын үсэг зурж байна. Цаашид үйлдвэрлэлийн болон ахуйн хог хаягдлыг шатааж, түүгээр нь эрчим хүч гаргаж, байгаль экологид учруулах хөнөөлийг бууруулья гэсэн агуулгаар хот хог хаягдлын стратегид өөрчлөлт оруулж байгаа. Удахгүй Төр, хувийн хэвшлэлийн түншлэлийн хуульд нэмэлт өөрчлөлт орсны дараа эдгээр аж ахуй нэгж байгууллагуудтай нэг бүрчлэн хэлэлцээр хийнэ. Мөн “Нура” гэх оношилгооны төвийн хамт олонтой мөн хамтын ажиллагааны санамж бичиг зурлаа. Нийслэл Улаанбаатар хотыг 2040 он хүртэл хөгжүүлэх төлөвлөгөө хэрэгжүүлэхэд бодитойгоор 160 их наяд төгрөгийн хөрөнгө оруулалт шаардлагатай” гэв.