НИТХ-ын ээлжит XX хуралдаанаар Нийслэлийн 2024 оны төсвийг баталлаа. Энэ талаар Нийслэлийн Засаг даргын орлогч П.Сайнзориг "Ирэх жилд нийслэлийн төсвийг 2.6 их наяд орчим орлого төвлөрүүлэх,үүнээсээ урсгал зардалд 1.1 их наяд, хөрөнгө орлогын зардал 850 гаруй тэрбум төгрөг байхаар баталж байна. Эдгээр төсөв мөнгө нийслэлийн өмнө тулгамдаж байгаа асуудлыг шийдвэрлэхэд чиглэж байгаа. Нэгдүгээрт, сэлбэ, баянхошуу, дэд төвийн бүтээн байгуулалтыг эхлүүлнэ. Өмнө нь бид дулаан, эрчим хүчний асуудлыг шийдвэрлэсэн. Эдгээр дэд бүтцээ түшиглэн нэгдүгээрт, иргэдийг орон сууцжуулах , нийтийн тээврийн чанар хүртээмжийг нэмэгдүүлэхэд анхааран ажиллана. Мөн сургууль, цэцэрлэгийн хүртээмжийг нэмэгдүүлэхэд 91 орчим тэрбум төгрөгийг зарцуулна. Энэ хүрээнд 42 сургуулийн цайны газрын тохижилт үйлчилгээнд төсөв тавьж батлуулсан. Авто замыг өргөтгөх, гэр хорооллын замыг холбох чиглэлд 77.4 тэрбум төгрөгийг тусгаж байна. Ирэх жилийн төсөв бол нийслэлийн дэд бүтцийн бүтээн байгуулалтын чиглэлд гол анхаарал хандуулж байгаа. Түүнээс гадна өмнөх оны төсөв хэлэлцэгдээд 70 хувьтай байгаа ажлыг энэ онд гүйцээн дуусгахаар орж ирж байна. Улаанбаатар хотыг бүхэлд нь камержуулах асуудалд 80 тэрбум төгрөг баталсан. Энэ удаагийн төсөв батлагдаж, сэлбэ, баянхошуу болон холбогдох төсөл арга хэмжээ хийж чадвал Улаанбаатар хотын агаарын бохирдлыг 30 орчим хувиар, замын хөдөлгөөний түгжрэлийг ч мөн энэ хэмжээнд буулгах зорилготой байна" гэв.