Яармагийн замд нүхэн гарц барих болсонтой холбоотойгоор тус чиглэл рүү түгжрэл үүсэж, иргэдийн дунд бухимдал үүсээд байна. Тодруулбал, 120 мянгат, тэмээтэй хөшөөтэй уулзварын хэсэгт хамгийн их ачаалал үүсэж, тус чиглэлд зорчдог иргэдэд ихээхэн чирэгдэл учирч байна. Үүнтэй холбоотойгоор Нийслэлийн Замын хөгжлийн газраас гаргасан дараах мэдээллийг хүргэж байна.

     Хан-Уул дүүргийн Засаг даргын Тамгын газрын захиалгаар Наадамчдын гудамж дахь Яармагийн авто замд явган хүний нүхэн гарц байгуулах ажил явагдаж байна. Энэ ажлын хүрээнд авто замыг сэтэлж, бүтээн байгуулалтын ажлыг үргэлжлүүлэх шаардлагатай болсон тул “Хүннү молл”-ын баруун урд талын уулзвараас “Шинэ өргөө” хороолол хүртэлх 200 метр замын хөдөлгөөний зохион байгуулалтад түр хугацаанд өөрчлөлт оруулах гэж байна. Тодруулбал,

• Наймдугаар сарын 1-11-ний хооронд зүүнээс баруун чиглэлийн,
• Наймдугаар сарын 11-22-ны хооронд баруунаас зүүн тийш чиглэсэн хөдөлгөөний зохион байгуулалтад  тус тус өөрчлөлт оруулах юм.    Тиймээс иргэд жолооч нарыг дээрх хугацаанд замын тэмдэг тэмдэглэгээний дагуу хөдөлгөөнд оролцохыг анхаарууллаа. Энэхүү 37.5 метр урттай нүхэн гарц ашиглалтад орсноор автомашин, явган хүний хөдөлгөөний огтлолцол үгүй болж, явган зорчигчид зам тээврийн осолд өртөх эрсдэл буурах юм байна.