Нийслэлийн төр, захиргааны байгууллагуудыг 2021 оны арванхоёрдугаар сарын 31-ний дотор Яармаг руу нүүлгэн шилжүүлэх Засгийн газрын тогтоол гарсан билээ. Нүүлгэн шилжүүлэхтэй холбоотой зардлыг Сангийн сайд Б.Жавхланд хариуцаж ажиллахаар болсон юм.

        Хотын захиргааг Яармаг руу нүүлгэн шилжүүлэх тогтоол гараад гурван сар, нүүж дуусахад 16 хоног үлдсэн байна. Нүүлгэн шилжилтийн ажил хэдэн хувьтай байгаа талаар Нийслэлийн Засаг даргын Тамгын газрын дарга Т.Оюунчимэгээс тодрууллаа.

       Тэрбээр “Яармаг руу нүүлгэн, шилжүүлэх ажил одоогоор эхлээгүй байна. Яармагт баригдсан шинэ байранд энэ долоо хоногт улсын комисс ажиллах төлөвлөгөөтэй байгаа. Улсын комисс ажиллаж, хүлээж авах хүртэл хугацаа орно. Гэхдээ бид Засгийн газрын тогтоол гарсан учраас тодорхой хэмжээнд нүүх бэлтгэлээ хангаж байна. Бүрэн гүйцэт нүүж чадахгүй учраас хэсэгчилж нүүнэ. Учир нь, ашиглалтад орсон байгаа шинэ байранд агентлагууд нүүж очихоор хүчин чадал хүрэхгүй. Замын ачаалал, түгжрээ, цэвэр, бохир усны хангамж гээд олон асуудал цэгцрээгүй байна.  Аль хэлтэс, агентлаг эхний ээлжинд нүүж очих нь эцэслэгдээгүй байна” гэлээ.