Түүхий нүүрсний хэрэглээг хориглосон Засгийн газрын тогтоолыг хэрэгцүүлэх чиглэлээр Мэргэжлийн хяналтын газраас хийж хэрэгжүүлсэн өнгөрсөн долоо хоногийн  ажлын мэдээллийг тус газрын АЧХХ-ын ахлах, байгаль орчны хяналтын улсын байцаагч Н.Нарангэрэл танилцууллаа.

Тэрбээр "Автотээврийн шалган нэвтрүүлэх товчоонд цагдаагийн байгууллагатай хамтран 24 цагаар хяналт шалгалтын үүрэг гүйцэтгэж байна. Тус хугацаанд Тавантолгой түлш компаны үндсэн түүхий эд болох угаасан нүүрс 225 тээврийн хэрэгслээр 9510 тонн нэвтэрсэн. Дулаан үйлдвэрлэх тусгай зөвшөөрөлтэй аж ахуй нэгж бол түүхий нүүрс хэрэглэж байгаа.

    Эдгээр аж ахуй нэгжид 105 тээврийн хэрэгслээр 2436 тонн түүхий нүүрс нэвтэрсэн байна. Мөн орон нутаг руу дамжин өнгөрч байгаа түүхийн нүүрс 53 тээврийн хэрэгслээр 1750 тонн тус бүр дамжин өнгөрсөн. Улаанбаатар хот руу зөвшөөрөлгүйгээр түүхий нүүрс нэвтрүүлэхийг завдсан хоёр зөрчил илэрсэн. 10 тонн түүхийн нүүрсийг цагдаагийн байгууллагатай хамтран Амгалан дулааны станцад төвлөрүүлж, зөрчлийн тухай хуулийн дагуу торгуулийн арга хэмжээ ногдуулсан. Мөн Улаанбаатар хотоос 200 шуудай сайжруулсан шахмал түлшийг хөдөө орон нутаг руу авч гарч байгаа зөрчлийг илрүүлэн, буцаах арга хэмжээ авсан" гэв.