Боловсролын зээлийн сан санхүүжилтгүй болсны улмаас 2021 оны 1-6 дугаар сарын өндөр оноо, буцалтгүй тусламжийн тооцооны мөнгийг өгөх боломжгүй болсон. Иймд өндөр оноо болон буцалтгүй тусламжаар суралцаад төгсөж буй оюутнууд зургадугаар сарын 10-ны дотор төлөлт хийнэ гэх мэдээлэл гараад байна.

Энэ талаар Боловсрол, шинжлэх ухааны яамны хэвлэлийн төлөөлөгчөөс тодруулахад “Боловсролын зээлийн сан санхүүжилтгүй болсон гэдэг худал мэдээлэл. Сангийн яамнаас тодруулахад “Ковид-19” халдварын үетэй холбоотойгоор улсын төсөвт тусгасан санхүүжилтэд асуудал гарсан байна лээ. Гэхдээ эх үүсвэр нь шийдэгдсэн. Одоогоор Сангийн яаман дээр санхүүжилтын эрх нээгдэхийг хүлээж байна. Оюутнуудын сургалтын төлбөртэй холбоотой санхүүжилтын асуудлаар ирэх долоо хоногт тайлбар өгнө. Одоогоор Сангийн яамнаас хариу ирэхийг хүлээж байгаа. Ямартай ч, мөнгө нь их дээд сургууль руу оюутнуудын нэрээр шилжинэ. Санхүүжилттай холбоотой уг асуудал энэ долоо хоногийн сүүлч гэхэд шийдвэрлэгдэнэ. Өндөр оноо, буцалтгүй тусламжаар сурч буй оюутнуудаас төлбөр нэхэхгүй байх талаар их, дээд сургуулиудад чиглэл өгсөн.” гэлээ.