ЭЕШ-ыг долдугаар сарын 1-4-ний хооронд танхимаар зохион байгууллахаар төлөвлөжээ. ЭЕШ-ыг ямар агуулгаар авах болон бэлтгэл ажил хэрхэн хангагдаж байгаа талаар Боловсролын үнэлгээний төвийн элсэлтийн шалгалт хариуцсан ахлах мэргэжилтэн М.Болдсайханаас тодрууллаа. 

ЭЕШ өгөх 31782 хүүхэд өнөөдрөөс танхимын давтлагад хамрагдана

     Тэрбээр "ЭЕШ-ын бүртгэл тавдугаар сарын 5-ны өдөр хүртэл үргэлжилж, 40420 суралцагч шалгалтад бүртгүүлсэн байна. Энэ хичээлийн жилд арванхоёрдугаар ангийг 34811 сурагч төгсөж байгаагаас 31782 нь ЭЕШ-д хамрагдахаар бүртгүүлжээ. Харин өмнөх оны төгсөгчдөөс 8638 сурагч ЭЕШ-д хамрагдах хүсэлт гаргаад байна. Бүртгүүлсэн сурагчдын 44 хувь нь эрэгтэй, 56 хувь нь эмэгтэй. Энэ жил газарзүйн хичээлээр ЭЕШ өгөх 1235 сурагч байгаа нь хамгийн бага үзүүлэлт болж байна. Мөн хамгийн их буюу 27951 сурагч математикийн хичээлийг сонгосон байгаа. ЭЕШ-д орох сурагчдын насны бүтцийг авч үзвэл, 15-16 настай 27 шалгуулагч, 17 настай 1675 шалгуулагч, 18 настай 25082 шалгуулагч, 19 настай 13636 шалгуулагч байна. Шалгуулагчдын дийлэнх нь насанд хүрсэн учир дархлаажуулалтад хамрагдаж эхэлсэн. Арванхоёрдугаар ангийн ЭЕШ өгөх хүүхдүүд өнөөдрөөс нэг сарын хугацаанд танхимын давтлагад хамрагдана" гэв.

ЭЕШ-ыг танхимаар орсон хичээлийн агуулгаар авна

  Мөн үргэлжлүүлэн тэрбээр "Энэ жил танхимаар судалсан хичээлийн агуулгаар ЭЕШ-ын даалгаврыг боловсруулна. Энэ жилийн төгсөгчид арваннэгдүгээр сар хүртэл танхимаар хичээллэсэн.Сурагчид аравдугаар ангийн хичээлээ танхимаар үзсэн тул аравдугаар ангийн хичээлийн агуулгыг бүтэн хамруулна. Өөрөөр хэлбэл, арваннэгдүгээр ангийн хичээлийн агуулгыг 50 хувь, энэ жилийн хичээлийн агуулгыг 30 хувь хамруулна гэсэн үг. Цахимаар судалсан хичээлийн агуулгыг шалгалтад оруулахгүй" гэлээ.

ЭЕШ-ыг долдугаар сарын 1-4 хооронд авахаар болж, Монгол хэл бичгийн шалгалтыг цуцаллаа

      Энэ жилийн ЭЕШ-ыг долдугаар сарын 1-4-ний өдрүүдэд зохион байгуулна. Үүнд:

-2021.07.01. Монгол Улсын түүх, Англи хэл

-2021.07.02. Хими, Газарзүй, Нийгэм судлал

-2021.07.03. Биологи, Математик

-2021.07.04. Физик, Орос хэл, Монгол хэл

ЭЕШ-аас өмнө шалгуулагчид Монгол хэл бичгийн шалгалтад хамрагдах ёстой байдаг. Тэгвэл энэ сарын 12-ны Засгийн газрын хуралдаанаар энэ шалгалтыг цуцлах шийдвэр гаргасан юм.

Коронавирусийн халдвар авсан сурагчдад тусгай анги бэлдэж, шалгалтад орох боломжоор хангана

      Сурагчдын суудлын хуваарь энэ сарын 20-ны өдөр тодорхой болох аж. Шалгуулагчид бүртгэлийн дугаар болон нууц үгээ ашиглан www.EEC.mn цахим хуудасны шалгуулагчийн булан хэсгээс суудлын дугаараа хэвлэж авах боломжтой. Шалгалтын нийт 50 байр ажиллах бөгөөд орох, гарах гарцыг тусгайлан гаргаж, шалгалтын байранд халдвар хамгааллын нарийн дэглэм мөрдүүлэх юм. Коронавирусийн халдвар авсан сурагчдыг шалгалтад орох бүх боломжоор хангах бөгөөд тусгай анги бэлдэж байгаа аж.

Энэ жил цахим хичээлд хамрагдаагүй 1-12 дугаар ангийн 103 мянган хүүхэд байна

      Цар тахлын улмаас ерөнхий боловсролын сургуулийн сурагчид арваннэгдүгээр сараас хойш цахим хичээл үзсэн. Тус хугацаанд 1-12 дугаар ангийн 103 мянган хүүхэд цахим хичээлд хамрагдаж чадаагүй байна. Тэдгээр хүүхдийн дүнг энэ жилийн нэгдүгээр улирлын дүнтэй дүйцүүлж гаргах аж. Харин цахим хичээлд хамрагдсан сурагчдын дүнг идэвх оролцоо, гэрийн даалгавар зэрэг багш өөрийн тавьсан шаардлагад нийцүүлэн тохирох дүн тавих юм.

ЭЕШ-ыг засахдаа шилэн технологи ашиглана

     ЭЕШ-ын үед ашиглах шууд засалтын шилэн технологийг 2019 оноос хэрэглэсэн. Шалгалт өгсөн хүүхдийн бүртгэлийн дугаарыг авсан оноотой нь шууд зарлаж,  шалгалт авсан сургуулийн пэйж хаягаар  лайв хийнэ. Шалгалт бүрийн дараа шалгалтын байранд дүн оноог мэдээлэх юм.

Цаашид ЭЕШ-ыг жилд хоёр удаа авдаг болно

      ЭЕШ-ыг цаашид жилд хоёр удаа авдаг болохоор бэлтгэл ханган ажиллаж байна. Сурагчид ЭЕШ-д бэлэн болсон гэж үзсэн үедээ шалгалт өгөх боломж бүрдэх юм. Мөн өмнөх шалгалтад тааруу дүн авсан шалгуулагч хагас жилийн дараа дахин шалгуулах боломжтой.

    Мөн гадаад улс оронд суралцах оюутнууд тухайн орны хэлний шалгалтыг амжилттай давах ёстой байдаг. Тухайлбал, IELTS, TOEFL, HSK гэх мэт шалгалттай дүйх хэмжээний Монгол хэл бичгийн үндэсний шалгалтын тогтолцоог бүрдүүлэх юм. ЕБС-ийн хичээл, сургалтын үр дүнг үнэлэх шалгуурыг боловсролын түвшин, анги, хичээл тус бүрээр боловсруулсан байна.