ДЦС-5 төслийн хүрээнд ДЦС-2-ын үнсэн сангийн талбайд 65 жилийн хугацаанд хуримтлагдсан 1 сая шоо метр үнсийг зөөж, талбайг чөлөөлөх ажил үргэлжилж байна.

   ДЦС-5 төслийн Техникийн хяналтын хэлтсийн ахлах инженер Л.Баасаны мэдээлснээр, өнөөдрийн байдлаар 300 мянган шоо метр үнсийг зөөж, чөлөөлөгдсөн талбайд барилгын суурийн ажлыг эхлүүлээд байгаа аж.

   Барилгын нийт суурийн ажлыг ирэх арванхоёрдугаар сард дуусгаж, улмаар буцаан булалтын ажилд шилжихээр төлөвлөжээ. Суурийн ажил нь газар доорх бүтээн байгуулалтын үндсэн үе шат бөгөөд энэ ажил дууссаны дараа металл бүтээц болон тоног төхөөрөмжийг суурилуулах юм.

  ДЦС-5-ыг 2028 оны гуравдугаар улиралд ашиглалтад оруулснаар 300 МВт цахилгаан, 340 Гкал дулааны эрчим хүч үйлдвэрлэх хүчин чадалтай болно. Ингэснээр 100 мянган айлыг цахилгаан, 40-50 мянган айлыг дулаанаар хангах боломж бүрдэх аж.

  Шинэ станц ашиглалтад орсноор Таван шар, 21 дүгээр хороолол, Хилчин хотхон, Баянхошуу болон 1, 3, 4 дүгээр хорооллыг найдвартай дулаанаар хангаж, Улаанбаатар хотын баруун хойд бүсийн дулааны гол эх үүсвэр болох ач холбогдолтой юм.