Энэ оны наймдугаар сарын 31-нээс есдүгээр сарын дөрөвний өдрүүдэд Улаанбаатар хотноо Олон улсын атомын энергийн агентлаг (ОУАЭА)-ийн бүс нутгийн хамтын ажиллагааны хүрээнд хэрэгжүүлсэн RAS6101 “Анагаахын физикчийн боловсрол, сургалтаар дамжуулан цацрагийн эмчилгээний чанар, аюулгүй ажиллагааг сайжруулах” төслийн хаалтын хурал болжээ.

   Тус хуралд ОУАЭА болон Ази, Номхон далайн бүсийн 18 орны төлөөлөл, үндэсний зохицуулагч, анагаахын физикчид оролцож, төслийн хэрэгжилтийн үр дүн, анагаахын физикчийн боловсрол, сургалт, хүний нөөцийн чадавхыг бэхжүүлэх чиглэлээр бүсийн хэмжээнд хэрэгжүүлсэн ажлын үр дүнг хэлэлцэж байгаа аж. Төслийн хэрэгжилтийн хугацаанд бүс нутгийн 20 гаруй орны 200 гаруй анагаахын физикчийг мэргэшүүлэх сургалт, тэтгэлэгт хөтөлбөрт хамруулжээ. Мөн мэргэшсэн анагаахын физикч бэлтгэх академик болон резидентурын 15 хөтөлбөрийг шинээр эхлүүлсэн байна.

   Үүний зэрэгцээ эмнэлгийн физикийн мэргэжлийн чадавхыг бэхжүүлэх чиглэлээр бүс нутгийн улс орнуудын хамтын ажиллагаа шинэ түвшинд хүрч, харилцан туршлага солилцон, дэмжлэг үзүүлж ажиллаж байгааг онцолжээ. Анагаахын физикч нь цацрагийн анагаах ухааны тусламж, үйлчилгээний чанар, аюулгүй байдлыг хангахад чухал үүрэгтэй мэргэжилтэн юм. Туяа эмчилгээ, цөмийн анагаах ухаан, дүрс оношилгооны техник, технологи эрчимтэй хөгжиж буй өнөө үед өндөр мэдлэг, ур чадвартай эмнэлгийн физикчдийн хэрэгцээ улам бүр нэмэгдэж байна.

   Монгол Улсын хувьд төслийн хүрээнд МУИС, АШУҮИС, ЭМХТ, ШНГТЭ, УХТЭ, ХСҮТ-ийн мэргэжилтнүүдийг бүсийн сургалтад хамруулсан байна. Түүнчлэн Тайландын Чулалонгкорны их сургуулийн резидентурын цахим хөтөлбөрт ХСҮТ болон ШНГТЭ-ээс нийт зургаан эмнэлгийн физикч суралцаж байгаа нь үндэсний чадавхыг бэхжүүлэхэд чухал хувь нэмэр болж байна. Мөн анагаахын физикийн академик хөтөлбөрийг эхлүүлэхээр АШУҮИС, МУИС хамтран ажиллаж байгаа бөгөөд уг мэргэжлийг эрүүл мэндийн салбарын хүний нөөцийн тогтолцоонд хүлээн зөвшөөрүүлэх чиглэлээр тодорхой ахиц гарчээ.

   Эдгээр үйл ажиллагаа нь Монгол Улсад анагаахын физикийн мэргэжлийн тогтолцоог бэхжүүлж, цацрагийн оношилгоо, эмчилгээний тусламж, үйлчилгээний чанар, аюулгүй байдлыг олон улсын түвшинд хүргэхэд чухал ач холбогдолтой юм. Хурлын үеэр Монгол Улс анагаахын физикчдийн чадавхыг бэхжүүлэх чиглэлээр АНУ, Австрали, Япон, Тайланд, БНСУ зэрэг улстай хамтран ажиллаж байгаа нь бүс нутгийн хэмжээнд үлгэр жишээ болохуйц туршлага гэдгийг төсөлд оролцогчид онцлон тэмдэглэжээ.