Хууль зүй, дотоод хэргийн сайдын энэ оны наймдугаар сарын 27-ны өдөр өгсөн үүрэг, Цагдаагийн ерөнхий газрын даргын баталсан төлөвлөгөөний хүрээнд улсын хэмжээнд ашигт малтмалын хууль бус олборлолттой тэмцэх хяналт шалгалтыг эрчимжүүлэн ажиллаж байна.

   Энэ хүрээнд тусгай зөвшөөрөлгүйгээр ашигт малтмал хайх, олборлох, бичил уурхайгаар ашигт малтмал олборлох журмыг зөрчих, газрын хэвлийд халдах, хүрээлэн буй орчинд их хэмжээний хохирол учруулах зэрэг үйлдлийг илрүүлж, таслан зогсоох зорилгоор Архангай, Баянхонгор, Булган, Дархан-Уул, Дундговь, Төв, Сэлэнгэ, Хэнтий аймагт хяналт шалгалтыг зохион байгуулж байгаа аж.

   Хяналт шалгалтын үеэр Баянхонгор аймгийн Бөмбөгөр, Хэнтий аймгийн Өмнөдэлгэр сумын нутаг дэвсгэрт үйл ажиллагаа явуулж буй нэр бүхий байгууллагууд тусгай зөвшөөрлийн талбайг хэтрүүлэн ашигт малтмал олборлосон байж болзошгүй гэмт хэргийн шинжтэй үйлдлүүдийг илрүүлжээ.

   Уг үйлдлүүдийг холбогдох хууль тогтоомжийн дагуу шалгаж, цаашид хяналт шалгалтыг улсын хэмжээнд үргэлжлүүлэн зохион байгуулах аж.