Нийслэлийн Онцгой байдлын газраас Гамшгийн эрсдэлийг бууруулах Нийслэлийн зөвлөлийн дэмжлэгтэйгээр Монголын Улаан загалмай нийгэмлэг, Монголын Оюутны холбоотой хамтран “Оюутан аврагч” арга хэмжээг анх удаа зохион байгуулжээ.

   Сургалтад нийслэлийн их, дээд сургуулийн 100 оюутан, Монголын Улаан загалмай нийгэмлэгийн 40 сайн дурын идэвхтэн хамрагдаж, гамшиг, ослоос урьдчилан сэргийлэх, үер, усны ослоос хамгаалах, анхны тусламж үзүүлэх болон аюулгүй ажиллагааны чиглэлээр мэдлэг, ур чадвараа дээшлүүлжээ.

   Мөн оролцогчид гал түймэр унтраах дадлага сургуулилтад хамрагдаж, онолын мэдлэгээ практикт бататгасан байна.

   Сургалтыг нээж Нийслэлийн Онцгой байдлын газрын дарга, хурандаа Г.Галбадрах гамшгийн эрсдэлийг бууруулах үйл ажиллагаанд залуучуудын оролцоо, сайн дурын идэвх санаачилгын ач холбогдлыг онцлон, оролцогчдод амжилт хүссэн аж.

   “Оюутан аврагч” арга хэмжээний танхимын сургалт есдүгээр сарын 3-нд эхэлсэн бөгөөд есдүгээр сарын 4-нд Туул голын эхэн дэх “Хар усан тохой” орчимд дадлага, практик сургалтаар үргэлжилнэ.

   Тус арга хэмжээ нь оюутан, залуучуудыг гамшгаас урьдчилан сэргийлэх үйл ажиллагаанд татан оролцуулах, өөрийгөө болон бусдыг аюулаас хамгаалах, анхны тусламж үзүүлэх, авран хамгаалах зөв дадал, чадварыг эзэмшүүлэхэд чиглэж байгаа ажээ.