Сэлэнгэ аймгийн Баянгол сумын Засаг дарга Н.Давааням ажлын байрны дарамт үзүүлсэн тухай тус сумын Эрүүл мэндийн төвийн эрхлэгч, их эмч Б.Баярмаа өөрийн цахим хуудсанд нийтлэгдсэн. Мөн Н.Даваанямыг өөрийн дүү нараараа эмчийн нийтлэл дор сөрөг сэтгэгдэл бичүүллээ гэх маргаан цахим орчинд өрнөөд буй. Тэгвэл бид энэ талаар их эмч Б.Баярмаагаас тодрууллаа.

        Тэрбээр “Засаг даргын яриад байгаа шигдээс болсон хүн нь миний төрсөн ах байсан. Энэ сарын 23-ны өдөр жижүүр эмч маань намайг өмнөх өдөр нь хагалгаанд орсныг, бас ах нь юм чинь хэлсэн байх гэж бодоод надад мэдэгдээгүй байсан. Тиймээс ах маань Дархан-Уул аймгийн Гуравдугаар эмнэлэг рүү тээвэрлэгдсэн. Засаг дарга болон Тамгын даргын өрөө хоорондоо хоёрхон алхмын зайтай байдаг. Засаг даргаас чөлөө авахаар ороход гадуур ажилтай гээд байгаагүй учраас Тамгын даргад “Би маргааш хагалгаанд орно. Миний ээлжийн амралтын хоног дутуу байсан, дээр нь шинжилгээгээ бүрдүүлсэн байсан шүү” гэж учраа хэлээд чөлөөгөө аваад явсан. Засаг даргын өрөөнөөс уйлаад гарсан. Тэр гомдлоороо лайв хийсэн. Түүнээс цагийн дараа Засаг дарга миний утас руу залгаад, дараа нь эмнэлэг дээр ирсэн. Тэгэхдээ “Баярмаа эмч ээ, хоёулаа одоо учраа олъё. Хүмүүст ч муухай харагдаж байгаа. Чи надад итгэж байх үед чинь туслаагүй. Миний буруу байжээ” гэж хэлээд бид хоёр 30 орчим минут ярилцсан. Би тухайн үед нь “Би танд өмнө нь тусалж байсан болохоор надад ч бас тэр сэтгэлээр минь туслах болов уу гэж горьдож ороод, түүнээсээ болоод өөрөө стресстэй, түргэдсэн байна лээ” гэж хэлсэн. Аль аль нь алдаа гаргасан байна. Тэр хүн түрүүлж уучлалт гуйж, надад муухай хандсанаа ойлгосон байна даа гэж би харсан. Тухайн үед миний даралт ихсээд, дусал хийлгэж байсан болохоор тэсээд гэртээ харьсан. Гэртээ байж байтал Тамгын дарга залгаад лайвыг маань устгуулсан. Тамгын дарга лайвыг маань хэрхэн устгуулсан, мөн эмнэлэг дээр ирээд уучлалт гуйж байгаа нь надад бичлэгээр байгаа. Засаг даргын дүү нар болон нэргүй, хуурамч сошиал хаягуудаас над руу маш их сөрөг сэтгэгдэл ирсэн. Мөн “Н.Даваанямыг суудлаас нь буулга” гэх мэт мессежүүд ч их ирсэн. Тэр хүмүүст би “Би хэн нэгэн хүнтэй жүжиг тоглоогүй. Надад тийм ёс зүй байхгүй. Энэ хүнийг албан тушаалаас нь буулгах бодол огт байхгүй” гэсэн тайлбарыг ч өгсөн. Тэгтэл түүний гомдолтой байна гэж байгаа нь намайг маш сонин, ойлгомжгүй байдалд орууллаа. Тиймээс би хэвлэлийн бага хурал зарлах болно. Мөн Эрүүл мэндийн яаманд гомдол гаргана” гэв.