Сэлэнгэ аймгийн Баянгол сумын Засаг дарга Н.Давааням ажлын байрны дарамт үзүүлсэн тухай тус сумын Эрүүл мэндийн төвийн эрхлэгч, их эмч Б.Баярмаа өөрийн цахим хуудсанд нийтлэгдсэн. Мөн Н.Даваанямыг өөрийн дүү нараараа эмчийн нийтлэл дор сөрөг сэтгэгдэл бичүүллээ гэх маргаан цахим орчинд өрнөөд буй. Тэгвэл бид энэ талаар Баянгол сумын засаг дарга Н.Даваанямтай холбогдож тодрууллаа.

     Тэрбээр “Тухайн эмчийг эзгүй үед эмнэлэгт нь хүний амь настай холбоотой асуудал гарсан байсан. Энэ тухай гудамжинд таарсан иргэн надад хэлсэн юм. Ийм асуудал үүсчхээд байхад долоо хоног ажлаа таслаад алга болчихоор нь “Яагаад ажил дээрээ байхгүй байгаа юм бэ. Танай дээр ноцтой асуудал үүссэн байна. Энэ тухай хэлж ярихгүй яасан юм” гэсэн зүйл л хэлсэн. Эмч “Би Тамгын даргатаа хэлчихсэн” гэдэг тайлбарыг өгсөн. Албан ёсоор бол сум орон нутгийн Эрүүл мэндийн төвийн дарга Сумын даргад ажлаа тайлагнаж, цагийн бүртгэлээ баталгаажуулах ёстой. Түүнээс биш өөрийнх нь хэлж буйгаар олон дахин загнаж, дарамталсан зүйл болоогүй. Лайв хийснийх нь дараа бид хоёр таван минут хэртэй л уулзсан. Тэр хүний орсон гарсан цаг нь хяналтын камерт бичигдсэн байгаа. Биднийг ярилцах үед хажууд манай орлогч сууж л байсан. Түүний хэлснээр 30 гаруй минут загнасан зүйл ерөөсөө байхгүй. Тэр үед би өөрт нь хандаж “Чи өөрөө хагалгаанаас гараад удаагүй, ахын чинь бие өвдсөн байгаа болохоор чи өнөөдөр хүний үг хүлээж авах тэнхэлгүй байх шиг байна. Гэхдээ би чамд хууль журмын дагуу шаардлага тавьсан шүү. Чамайг эмэгтэй хүн болохоор би албан ёсоор түрүүлж уучлалт гуйя” гэдгээ хэлсэн, уучлалт гуйсан. Бид хоёр урьд нь муудаж, сайдаж байсан зүйл огт байхгүй. Өөрөө эмч хүн байж жил гаруйн өмнө өвчнөөр өөд болсон ээжийн минь тухай мэдээллийг олон нийтийн сүлжээнд дэлгэж байгаад нь би гомдолтой байна. Ээжийн минь тухай бичсэн учир ах дүү нар маань ганц хоёр газар өөрсдийн үзэл бодлоо бичсэн байх. Бусдаар цахим орчинд сэвэгдээд байгаа шиг би дүү нараараа өөрийгөө өмөөрүүлсэн сэтгэгдэл бичүүлээгүй. Аан харин тухайн өвчтөний оношийг буруу тавьсан, амь насанд нь эрсдэл учрах дөхсөн зэрэг асуудал одоо шалгагдаж байгаа юм билээ. Аймгийн эрүүл мэндийн төвөөс ирэх долоо хоногт албаны баг ирж нарийн зүйлсийг тодруулах байх” гэв.