Нийслэлийн төрийн өмчийн 158 сургуульд үдийн хоолны хөтөлбөр хэрэгжиж, нийт 156,928 суралцагч хамрагдаж байна. Мөн төрийн өмчийн 327 цэцэрлэгт 100,039 хүүхдийг өдөр тутмын хоол хүнсээр хангаж байгаа юм. Эдгээр 158 сургуулиас 116 нь үдийн хоолоо өөрсдөө бэлтгэдэг бол 42 сургууль нь тоног төхөөрөмж, хүний нөөцийн хүрэлцээгүй байдлын улмаас хувийн аж ахуйн нэгжүүдтэй хамтран ажиллаж байна. Хүнс хангамжийн үйл ажиллагааг цахим дэлгүүрийн системээр зохион байгуулах эрх зүйн орчин бүрдсэн бөгөөд өмнө нь худалдан авалтыг төрийн өмчит дөрвөн хүнс хангамжийн байгууллагаар дамжуулан хийдэг байжээ.

   Энэ талаар нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Төр хувийн хэвшлийн үр ашигтай хэрэгжүүлж чадах ажлыг өөр дээрээ авахгүй байх бодлого баримталж, ерөнхий боловсролын сургууль, цэцэрлэгийн хүнс бэлтгэдэг төрийн өмчит дөрвөн байгууллагыг татан буулгасан. Хоол хүнсний асуудал нь хүүхдийн эрүүл мэндтэй шууд холбоотой тул онцгой хариуцлагатай хандах шаардлагатай. Иймээс хүнс хангамжийн тогтолцоог дахин төлөвлөж, холбогдох байгууллагуудын уялдаа холбоог сайжруулах, аж ахуйн нэгжүүдтэй хамтран шийдэл боловсруулж, хэрэгжилтийг үр дүнтэй зохион байгуулахыг холбогдох албаныханд үүрэг болгож байна” хэмээн онцоллоо.