Бүтээн байгуулалтын нээлтийн ёслолд Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх, УИХ-ын гишүүн, Батлан хамгаалахын сайд Д.Батлут, Үндэсний аюулгүй байдлын зөвлөлийн Нарийн бичгийн дарга А.Бямбажаргал, Зэвсэгт хүчний Жанжин штабын дарга, дэслэгч генерал С.Ганбямба, Хил хамгаалах ерөнхий газрын дарга, хилийн цэргийн командлагч, хошууч генерал Ж.Бямбасүрэн, Батлан хамгаалах яам, Зэвсэгт хүчний Жанжин штабын удирдлагууд, төрлийн цэргийн командлагчид, ҮБХИС-ийн багш, эрдэмтэн судлаачид болон сонсогчдын төлөөлөл оролцов.

   Шинээр байгуулагдах Олон улс судлалын хүрээлэн нь үндэсний аюулгүй байдал, батлан хамгаалах бодлого, олон улсын харилцаа, бүс нутгийн судалгааны чиглэлээр эрдэм шинжилгээ, сургалт, судалгаа явуулах, мэдээлэл, бодлогын зөвлөмж боловсруулах үндэсний хэмжээний судалгаа, шинжилгээний төв болон хөгжихөөр төлөвлөж байна. Мөн улс орны хөгжлийн бодлого, төлөвлөлтөд бодит хувь нэмэр оруулах эрдэм шинжилгээний бүтээл, судалгаа, бодлогын зөвлөмжүүдийг боловсруулах юм.

   Ёслолын үеэр Монгол Улсын Ерөнхийлөгч хэлсэн үгэндээ тус хүрээлэн нь үндэсний аюулгүй байдал, батлан хамгаалах судлал, цэргийн шинжлэх ухаан, олон улсын харилцааны судалгааны хөгжилд шинэ шат нээж, энэ салбарын эрдэм шинжилгээний чадавхыг бэхжүүлэхэд чухал үүрэг гүйцэтгэнэ гэдгийг онцлон тэмдэглэлээ.