Монгол Улсын Ерөнхий сайд Н.Учрал 2026–2027 оны өвөл, хаврын бэлтгэлийг улсын хэмжээнд эртнээс шуурхай зохион байгуулах, болзошгүй эрсдэлийг урьдчилан тооцож, шаардлагатай арга хэмжээг цаг алдалгүй хэрэгжүүлэх зорилгоор өнөөдөр (2026.07.20) аймаг, нийслэлийн удирдлагуудтай цахим хурал хийлээ.

Хурлын үеэр Ерөнхий сайд өвөлжилтийн бэлтгэлийг хангах хүрээнд дараах найман чиглэлээр үүрэг, даалгавар өгсөн байна.

• Ургац хураалтын ажилд сайн дурын цэргийн алба хаагчдыг оролцуулж, хөдөлмөрийн хөлсний хэмжээг тогтоох, шатахуун, түлшний тасалдалгүй хангамжийг бүрдүүлэх.

• Өвс, тэжээлийн улсын нөөцийг бүрэн бүрдүүлж, нөөцийн махны хэмжээг эцэслэн тогтоон бэлтгэх.

• Малчдыг тусгай хамгаалалттай бүсэд отроор өвөлжүүлэх асуудлыг хамтын зөвшилцлөөр шийдвэрлэж, эмнэлгийн тусламж, үйлчилгээг тасралтгүй хүргэх.

• Малын вакцинжуулалт, халдваргүйжүүлэлтийн ажлыг бүрэн дуусгах.

• Өвөлжилтийн эрсдэлийг орон даяар үнэлж, түлш, эрчим хүч, хүнс, эм, шатахуун, өвс, тэжээлийн нөөцийг бүрдүүлэх.

• Дулааны цахилгаан станц болон зуухнуудын засварын ажлыг есдүгээр сарын 1-ний дотор дуусгаж, 10 аймагт ДЦС барих ажлыг эрчимжүүлэх.

• Гэр хорооллын айл өрхүүдийг сайжруулсан болон хагас коксон түлшээр хангалттай хэмжээнд хангах.

• Цасны улмаас авто зам хаагдах эрсдэлээс сэргийлж, автомашин, техник, тоног төхөөрөмжийн бэлэн байдлыг бүрэн хангах.

   Ерөнхий сайдын албан даалгаврын хэрэгжилтэд Шадар сайд Н.Номтойбаяр хяналт тавьж, аймаг, орон нутагт биечлэн ажиллан шалгах бөгөөд ирэх есдүгээр сарын 15-наас өмнө өвөлжилтийн бэлтгэл, бэлэн байдлыг бүрэн хангуулж ажиллах юм. Мөн холбогдох салбарын сайд нар орон нутагт ажиллаж, тулгамдаж буй асуудлыг газар дээр нь шийдвэрлэхэд анхаарахаар боллоо.