Улсын төсвийн хөрөнгө оруулалтаар хэрэгжүүлж буй А0201 дугаартай Улаанбаатар–Мандалговь чиглэлийн авто замын 28 км хэсгийн их засварын ажил төлөвлөгөөний дагуу үргэлжилж байна.

   Төслийн хүрээнд их засварын ажлыг хоёр багц болгон хэрэгжүүлж байгаа бөгөөд хоёрдугаар багцын 122+200–134+800 км авто замын хэсгийн ажлыг "Тэгш плант" ХХК хариуцан гүйцэтгэж байгаа юм.

   Одоогийн байдлаар хуучин замын даланг өргөтгөх, асфальт хучилтыг дахин боловсруулах, цементээр бэхжүүлсэн суурь болон суурь асфальтбетон хучилтын ажлууд үе шаттай үргэлжилж байна. Тодруулбал, хуучин асфальт хучилтыг 8 км, цементээр бэхжүүлсэн суурийг 5 км, суурь асфальтбетон хучилтыг 1.5 км урт хэсэгт тус тус хийж гүйцэтгээд байна.

   Зам засварын ажил үргэлжилж буйтай холбоотойгоор жолооч, зорчигчдыг замын хөдөлгөөний тэмдэг, тэмдэглэгээг чанд мөрдөх, хурд хэтрүүлэхгүй байх, замын далан руу авирахгүй байх, түр замын хажуугаар зөвшөөрөлгүй шинэ гарц гаргахгүй байх зэрэг аюулгүй ажиллагааны шаардлагыг сахиж, хөдөлгөөнд анхаарал болгоомжтой оролцохыг Дундговь аймгийн Засаг даргын Тамгын газраас анхаарууллаа.