Хар усан тохойгоос Зайсангийн гүүр, Зайсангийн гүүрнээс Сонсголонгийн гүүрийн чиглэл, мөн Тэрэлж, Хэрлэн голын дагуу завьт болон хөдөлгөөнт эргүүлүүд тасралтгүй ажиллаж байна. Үүнээс гадна алба хаагчид морь, суррон ашиглан эргүүл хийж, дроноор хяналт тавин ажиллаж байгаа аж.

   Эдгээр өдрүүдэд нийслэлийн Онцгой байдлын газрын 242 алба хаагч 64 автомашин, 10 мотопомптойгоор үүрэг гүйцэтгэж байна. Мөн Гамшгаас хамгаалах улсын бүртгэлийн байгууллагын 19 алба хаагч найман автомашинтай, Ус сувгийн удирдах газрын 50 ажилтан 47 автомашинтайгаар ажиллаж байгаа бөгөөд нийтдээ 311 алба хаагч 119 нэгж техник, тоног төхөөрөмж, багаж хэрэгслийн хамт өндөржүүлсэн бэлэн байдалд ажиллаж байна.

   Түүнчлэн гол, усны ослоос урьдчилан сэргийлэх чиглэлээр 12,350 иргэнд сэрэмжлүүлэг, санамжийн хуудас тарааж, голын эрэгт байрласан 1,345 автомашиныг аюулгүй зайд шилжүүлэн анхааруулжээ.

   2026 оны долоодугаар сарын 10-18-ны өдрийн байдлаар гол, усны осолтой холбоотой нийт 64 дуудлага, мэдээлэл бүртгэгдсэн байна. Энэ хугацаанд таван иргэнийг уснаас аварч, үер болон усны ослын эрсдэлтэй бүсээс 88 хүнийг аюулгүй газарт гаргасны 35 нь хүүхэд байсныг албаныхан мэдээллээ.