Архангай аймгийн Хотонт сумын харьяат, Цэргийн заан Б.Гончигсүрэн Өмнөговь аймгийн баяр наадамд түрүүлж Аймгийн арслан цол хүртээд байсан юм.

    Тэрбээр аймгийн арслан цолоороо удаан чимж амжсангүй. Тодруулбал, Үндэсний их баяр наадмын Хүчит 1024 бөхийн барилдааны тавын даваанд Ховд аймгийн Мөст сумын харьяат, аймгийн арслан М.Баяржавхлантай тунаж, давснаар Улсын начин цолтон болсон билээ.

Бид Монгол Улсын начин Б.Гончигсүрэнтэй холбогдож баяр наадмын сэтгэгдлийг нь сонслоо.  

Тэрбээр “Та бүхэнд болон нийт Монголын ард түмэндээ үндэсний баяр наадмын мэнд дэвшүүлье. Өмнөговь аймгийн баяр наадамд түрүүлж Аймгийн арслан цол хүртсэн. Ээлтэй, сайхан нутаг юм билээ, Өмнөговь аймгаас ирээд төрийн их баяр наадамдаа зодоглож Монгол Улсын Начин цол хүртсэндээ баяртай байна. Монгол Улсын Арслан Р.Пүрэвдагва, Улсын Гарди Д.Рагчаа, н.Ганзориг, н.Чинбат багш нартаа болон “Бөх билэгт” дэвжээнийхээ хамт олонд баярлалаа гэж хэлмээр байна. Үргэлж дэмжиж, урам хайрладаг нутаг усныхан болон монголчууддаа маш их баярлалаа” гэв.