Үндэсний их баяр наадам өргөн дэлгэр боллоо. Энэ жилийн баяр наадамд хүчит 1024 бөх зодоглосноос тавын даваанд шинээр 17 начин төрсөн билээ.

Тухайлбал, Сүхбаатар аймгийн Онгон сумын харьяат аймгийн хурц арслан Б.Номиндалай П.Бүрэнтөгс аваргаар тав давж, Улсын начин цолны болзол хангасан юм.

Тэрбээр, өөрийг нь улсын цолонд хүрээсэй гэж олон жил дэмжиж, чимээгүйхэн дээлийнх нь захыг мушгиж явсан бөхийн хорхойтнууд, фэнүүдийнхээ хүслийг биелүүлж чадсан юм.

Өсөхөө дүү маань улсын цолтны хаалгыг сайхан нээж өглөө.

Бид Сүхбаатар аймгийн Онгон сумын харьяат Монгол Улсын Начин Б.Номиндалайтай холбогдож баяр наадмын талаарх сэтгэгдлийг нь сонслоо.

Тэрбээр “Олон жил уйгагүй хөдөлмөрлөсөнийг зүлэг ногоон дэвжээ минь ивээж Монгол Улсын Начин гэдэг сайхан цолыг хүртлээ. Түрүү жил Н.Өсөхбаяр дүү маань Монгол Улсын Гарди цол хүртсэн. Нутаг уснаас маань жил дарааллаад улсын цолтон төрж буйд баяртай байна. Өсөхөө дүү маань улсын цолтны хаалгыг сайхан нээж өглөө. Бидний ард сайхан жигдэрч яваа Аймгийн арслангууд маань бий. Тэд маань ч бас удахгүй улсын цолтны эгнээнд ороод ирэх байх гэж бодож байна. Нийт монголчууддаа баяр наадмын мэнд дэвшүүлж, эрүүл энх сайн сайхныг хүсье. Та бүхэн минь сайхан наадаарай” гэв.