“Эрин зууны бахархал Эрдэнэт” 50 жилийн ойн хүрээнд Эрдэнэт хотын 30 гаруй мянган айл өрхөд гарын бэлэг хүргэхээр бэлтгэж байна. Түүхт ойн хүрээнд айл өрх бүрт хүргэх энэхүү бэлэг нь орон нутгийн үйлдвэрлэгч уул уурхайн “Эрдмин” ХХК-ийн үйлдвэрлэсэн зэс уртасгагч залгуур байх юм.

Үндэсний үйлдвэрлэлээ дэмжсэн, чанар, аюулгүй хэрэглээг эрхэмлэсэн энэхүү бүтээгдэхүүн нь Эрдэнэт хотын 50 жилийн ойн бэлгэдэл, дурсгал болон айл өрхүүдэд хүрнэ. 

Тус компани 2023 оноос эхлэн ERD-23 ухаалаг уртасгагчийг үйлдвэрлэж эхэлсэн бөгөөд зэс бүтээгдэхүүний нэр төрлийг нэмэгдүүлэн 2025 оноос бэлэг дурсгалын зүйл, цом, медаль зэрэг бүтээгдэхүүн үйлдвэрлэж эхэлжээ. 

“Эрин зууны бахархал Эрдэнэт” 50 жилийн ойн баяр наадмын бэлгийн багцыг орон нутгийн аж ахуйн нэгж, үйлдвэрлэгчид болон иргэдээс худалдан авч буй нь дотоодын үйлдвэрлэлээ дэмжих, орон нутгийн брэнд бүтээгдэхүүнийг сурталчлан таниулах, эдийн засгийн эргэлтийг нэмэгдүүлэхэд бодит дэмжлэг болж байна.