Шударга өрсөлдөөн, хэрэглэгчийн төлөө газраас арваннэгдүгээр сарын 19-нд зургаан дүүргийн нутагт дэвсэрт байрлах 56 зах, худалдааны төв, жижиг дэлгүүр, 24 жижиг эмийн сан болон Орхон аймагт хяналт шалгалт хийжээ.

Шалгалтаар:

• Хан-Уул дүүргийн 11 дүгээр хороонд байрлах “Эфес” супермаркетэд махны лангуу түрээслэн ажиллуулдаг иргэн Т нь цар тахлын онцгой нөхцөл байдлын үед махны үнийн хөөрөгдөл үүсгэсэн нь тогтоогдож Зөрчлийн тухай хуулийн 10.7 дугаар зүйлийн 4.7 дахь хэсэгт заасныг үндэслэн хоёр сая төгрөгийн торгууль ногдуулсан байна.
•  
• Хүчит шонхор захын үнийг арванннэгдүгээр сарын 19-ны өглөө 09:00 цагаас өмнөх өдрийн 09:00 цагийн байдлаарх үнэтэй харьцуулахад хонины ястай махны жижиглэнгийн үнэ 500-1000, хонины цул мах 500 төгрөгөөр, үхрийн ястай мах 500 төгрөгөөр буурсан байна. Ямааны махны бөөний үнэ 100, адууны мах 500 төгрөгөөр тус тус нэмэгджээ. Мөн тус захад 41.5 тонн мах нийлүүлэгдэж, өмнөх өдрөөсөө махны нийлүүлэлт 9 тонноор буурсан байна.

• Баянгол дүүргийн III хорооны Нарны хороололд байрлах таван хүнсний дэлгүүр, хоёр махны дэлгүүрт хяналт шалгалт хийж тус хорооллын Марал хүсний дэлгүүрт 420 төгрөгөөр зарагдаж байсан өндөгний үнийг 400 болгож буулгаж газар дээр нь зөрчил арилгуулжээ. Мөн тус дүүрэг, хороонд байрлах “Шилмэл мөнх фарма” эмийн санд Монхимо 30 мл-тэй санитолыг 2000 төгрөгөөр худалдан борлуулж байсныг 1600 болгон буулгасан байна.  
•  
• Хэрэглэгчийн гаргасан “Хан-Уул дүүрэгт байрлах “Мөнх суварга” супермаркетад Баян, НВЦ-ийн өндөг 432 төгрөгөөр худалдаалагдаж байна” гэх гомдлын дагуу шалгахад задгай өндгийг 390 төгрөгөөр, савласан /пакеттай/ 10 ширхэгтэй өндгийг 4320 төгрөгөөр худалдаалсан  болох нь тогтоогдсон. Савласан өндөгний үнийг бууруулж 10 ширхэгтэй савласан өндгийг 4100 болгохоор кассын программд өөрчлөлт оруулж, газар дээр нь шийдвэрлэсэн байна.

Хяналт шалгалтад 24 эмийн сан хамрагдсанаас 10 эмийн санд спирт дууссан бол амны хаалт, гар ариутгагчийн нөөц хангалттай. Нэг удаагийн амны хаалт 300-550 төгрөгийн хооронд худалдаалагдаж байна. Мөн Баянгол дүүргийн 3 дугаар хороо Нарны хороололд байрлах таван хүнсний дэлгүүр, хоёр махны дэлгүүрт гурилын нөөц бага, зарим дэлгүүрт гурил огт байхгүй байна.

 “Хэрэглэгчийн мэдээллийн төв”-ийн 115 утсанд өнгөрсөн пүрэв гарагт 45, чатботоор 11 нийт 56 иргэн өргөн хэрэглээний хүнсний бараа бүтээгдэхүүн буюу мах, гурил, будаа, цагаан идээ, маскны үнэ нэмэгдсэн талаар гомдол мэдээлэл өгчээ. Хяналт шалгалтын хүрээнд махны дээд үнийг 12500 төгрөгт барьж ажиллаж байна.

Эх сурвалж: Шударга өрсөлдөөн хэрэглэгчийн төлөө газар