ЭМЯ-наас коронавирусын халдварын талаарх цаг үеийн ээлжит мэдээлэл хийлээ. Энэ үеэр ХӨСҮТ-ийн тандалт, судалгааны албаны дарга Л. Амбасэлмаа “Өчигдөр 820 хүнд коронавирусын шинжилгээ хийхэд гурван хүнээс коронавирусын халдвар илэрсэн. Энэ нь тусгаарлагдаж байсан эмч, ажилтан, жолооч Д-гийн ойрын хавьтал болох дөрвөн настай хүү юм. Ингээд жолооч Д-гийн голомтод долоон тохиолдол бүртгэгдлээ” гэв. Манай улсад коронавирусийн 416 тохиолдол бүртгэгдэж 450 гаруй эмч, мэргэжилтнүүд 24 цагаар ажиллаж байна.

Харин Сэлэнгэ аймагт 74 настай иргэнээс коронавирусын  халдвар илэрсэн. Түүний бэр болох нэгдүгээр хавьтагч Дархан аймагт зорчсон өгүүлэмжтэйгээр тусгаарлагдсан. Тэгвэл Дарханы "Оргил" худалдааны төвд үйлчлүүлсэн хүүхдүүд, үйлчилгээний ажилчид, эцэг эх, хүсэлт гаргасан нийт 139 иргэнээс урд шөнө PCR шинжилгээ авахад хариу нь бүгд сөрөг гарсан байна. Өөрөөр хэлбэл, эдгээр хүмүүст коронавирусийн  халдвар илрээгүй байна.

Түүнчлэн Онцгой комисст ажиллаж байгаа ажилтан албан хаагч, сэтгүүлч 42 хүнд түргэвчилсэн шинжилгээ хийж хариу сөрөг гарсан гэдгийг Дархан-Уул аймгийн онцгой комиссоос мэдээлсэн.