А.Амбасэлмаа: Зургаан хүнээс коронавирусийн халдвар илэрлээ

Б. Гүнжид:
Монголчуудын амьдрал- Мэдээ мэдээлэл

2020-11-13, 1352

ЭМЯ-наас коронавирусийн халдварын талаарх цаг үеийн ээлжит мэдээлэл хийлээ. Энэ үеэр ХӨСҮТ-ийн тандалт, судалгааны албаны дарга Л. Амбасэлмаа “Өчигдөр 1030 хүнд шинжилгээ хийсэн. ХӨСҮТ-ийн хоёр эмч, ажилтны шинжилгээ эерэг гарсан. Мөн Улаанбаатар хотод гарсан халдварын ойрын хавьтал болох 125 хүнд шинжилгээ хийхэд таван хүнээс коронавирус илэрсэн. Түүнчлэн Сэлэнгэ аймагт оршин суух гурван хүнээс коронавирус илэрсэн” гэв. Сэлэнгэ аймагийн 74 настай эмэгтэй хоёр удаагийн шинжилгээний хариу эерэг гарсан. Түүнд арваннэгдүгээр сарын 6-нд зовиур илэрсэн 38 хэм халуурсан өгүүлэмжтэй, 9-нд эмнэлэгт хандан PCR шинжилгээ хийхэд халдвартай болох нь тогтоогдсон.

Тэгвэл тус иргэний нэгдүгээр хавьтагчид буюу хамт амьдардаг бэр болон ач хүүхдийнх нь шинжилгээний хариу мөн эерэг гарчээ. Бэр нь арваннэгдүгээр сарын 8-ны өдөр Сэлэнгийн Сүхбаатар сумаас Дархан-Уул аймаг руу найман настай хүүхдийнхээ хамтаар хоёр өдөр амны хаалтгүй зорчсон, хүний хөл хөдөлгөөн ихтэй таван худалдааны төвөөр үйлчлүүлж нэг газраа 20-30 минут байсан, хүүхдээ тоглоомын газар тоглуулсан зэрэг өгүүлэмжтэй байгаа аж. Мөн тус тоглоомын төвөөр үйлчлүүлсэн 67 хүүхэд байгаа ба эцэг эхчүүдтэй нь холбогдон, тандалт судалгааг эхлүүлжээ. Мөн дам хавьтагчдыг илрүүлж тогтоохоор албаныхан ажиллаж байгаа аж.

Одоогоор манай улсад бүртгэгдсэн коронавирусийн нийт тохиолдол 412 болж, үүнээс 317 хүн эдгэрч, эмнэлэгээс гарсан байна.

А.Амбасэлмаа: Зургаан хүнээс коронавирусийн халдвар илэрлээ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.